Kinagat ng aso, pahiwatig na malalagpasan ang mabigat na problema

ni Estrellia de Luna - @Panaginip gabay ng buhay | April 05, 2021

Analisahin natin ang panaginip na ipinadala ni Jennifer ng Caloocan.

Dear Maestra,

Kumusta kayo? Nawa’y nasa mabuti kayong kalagayan.

Napanaginipan kong naglalakad ako sa kalsada at may nakasalubong na aso. Panay ang tahol niya sa akin hanggang sa tuluyan itong lumapit at kinagat ako, kaya nagsisigaw at nag-iiyak ako. Nang ako’y mahimasmasan, taimtim akong nagdasal na sana ay walang rabies ang asong nakakagat sa akin. Ano ang ibig sabihin nito?

Naghihintay,

Jennifer ng Caloocan

Sa iyo, Jennifer,

Maganda ang ipinahihiwatig ng panaginip mo. Ibig sabihin, malalagpasan mo na ang mabigat na problemang gumugulo sa iyong isipan sa nakaraang mga araw. Malulutas mo na ang mga ito at magiging maligaya ka na. Batid kong nagdaan ka sa matinding pagsubok noong mga nakalipas na araw at halos hindi mo malaman ang iyong gagawin.

Subalit sa tindi ng iyong pananalig sa Diyos, sasaiyo na ang magagandang kapalaran at pagpapalain ka na. Ito ay patunay lang na napakahalaga ng pagdarasal sa buhay ng tao. Ipagpatuloy mo ang marubdob na pananalig sa Diyos at makatitiyak ka na magaan mong malalampasan ang anumang pagsubok na darating sa iyong buhay.

Matapat na sumasaiyo,

Maestra Estrella de Luna