Kasong child sex trafficking, fraud, cash smuggling... US sa ‘Pinas: Quiboloy, isuko na

ni Mylene Alfonso @News | August 7, 2026

Photo: File / Senate PH

Pormal nang hiniling ng pamahalaan ng Estados Unidos ang extradition ni Kingdom of Jesus Christ (KOJC) leader Apollo Quiboloy upang litisin sa mga kasong child sex trafficking, fraud, bulk cash smuggling at iba pang paglabag sa Amerika.

“The formal request has been transmitted to the Department of Justice,” pahayag ni Philippine Ambassador to Washington Jose Manuel “Babe” Romualdez.

Si Quiboloy ay inaresto noong Setyembre 2024 dahil sa kasong paglabag sa Republic Act 7610 o Special Protection of Children Against Abuse, Exploitation, and Discrimination Act.

Nahaharap din siya sa kasong non-bailable qualified human trafficking sa ilalim ng Section 4(a) ng Republic Act No. 9208, na inamyendahan, na nakabinbin sa isang hukuman sa Pasig.

Noong Nobyembre 2021, inanunsyo ng mga piskal sa Estados Unidos ang pagsasampa ng kasong sex trafficking laban kay Quiboloy.

Ayon sa mga awtoridad, pinilit umano ang ilang menor-de-edad at kabataang babae na makipagtalik sa lider ng Kingdom of Jesus Christ (KOJC) at iba pang opisyal ng Simbahan.

Ayon naman sa federal prosecutors sa Los Angeles, siyam na indibidwal ang kinasuhan kaugnay ng umano’y paggamit ng mga mapanlinlang na visa upang madala sa Amerika ang mga miyembro ng Simbahan at mapilitang mangalap ng donasyon para sa isang pekeng children’s charity.

Samantala, sinabi ng Department of Justice (DOJ) na wala pa silang natatanggap na pormal na kahilingan mula sa Estados Unidos.

“As of this time, the DOJ has not officially received any document indicating that the United States has formally requested the extradition of Apollo Quiboloy,” wika ni DOJ spokesman Polo Martinez

“Under the Philippine-U.S. Extradition Treaty and applicable law, the DFA would be the first point of contact for such a request. Initial inquiries may therefore be directed to the DFA,” dagdag ni Martinez.