ni Fr. Robert Reyes @Kapaayapaan / Patakbo-takbo | Abril 8, 2024
Nagbitiw ng mga mabibigat na salita ang dating Pangulo ng Estados Unidos na si Donald Trump.
Ito ang sinabi niya tungkol sa mga migranteng ilegal: “Immigrants illegally in the United States are “animals” and “not humans.”
Sa Davao City naman, nagpahayag si Mayor Sebastian “Baste” Duterte noong nakaraang Marso na nagbalik na uli ang programang “war on drugs” na sinimulan ng kanyang amang dating mayor ng Davao at dating pangulo na si ex-Pres. Rodrigo Duterte.
Apat na araw pagkatapos ng pahayag ni Mayor Baste hinggil sa pagbabalik ng war on drugs, natagpuan ang mga bangkay ng pitong pinaghihinalaang sangkot sa droga. Paliwanag ni Mayor Baste na kinakailangang kumilos na siya, kasama ng mga pulis upang sugpuin ang salot ng droga.
Mali ang akala ng marami na dahil nakaupo na ang kasalukuyang administrasyon, tapos na at hindi na babalik ang war on drugs, ang pangunahing program ng nagdaang administrasyon. At basang-basa kung bakit ganito ang statement ng mayor ng Davao na anak ng dating pangulo. Hindi na niya kailangang sabihin na hindi niya sinusuportahan ang mga programa ng kasalukuyang administrasyon, sapat nang sabihin na muling nabuhay at mananatili sa Davao ang sinimulang programa ng kanyang ama.
Ilang araw pagkatapos ipahayag ng alkalde ng Davao na itutuloy niya ang programang sinimulan ng kanyang ama, naririyan na naman ang isa pang usapin ng extra judicial killings na lumaganap hindi lang sa Davao kundi sa buong bansa. Kung tunay ngang hindi na ito ang programa ng kasalukuyang administrasyon, hinihintay ng marami ang pahayag mula Malacañang na tumututol sa ganitong uri ng pagpugsa sa problema ng droga.
Simple lang ang paliwanag ng mga makapangyarihang lider kung bakit nila inuusig at pinalalabas na masama at salot ang mga miyembro ng partikular na sektor. Maaalala natin ang simpleng eksplanasyon ni Hitler tungkol sa dahilan ng kahirapan ng Alemanya noong panahon niya. Ang mga Hudyo ang dahilan kung bakit naghihirap ang Alemanya. Sila ang marunong magpalago ng salapi sa mga bangko, samantalang naghihirap ang mga karaniwang Aleman. Ang mga Hudyo ayon kay Hitler, ang salot ng lipunang Aleman. Dapat lang mawala ang mga ito sa lalong madaling panahon bago tuluyang manghina hanggang mawasak ang lipunang Aleman.Hindi ba’t ganito magpaliwanag ang dating pangulo ng Estados Unidos na si Donald Trump. Ayon kay Trump, dahil sa mga ilegal na migranteng manggagawa, lalo na ang mga Mexican, unti-unting naghihirap ang lipunang Amerikano.
At paulit-ulit naman nating naririnig mula sa bibig ng dating presidente kung paano napakalaking epekto sa buong lipunang Pilipino ang tuluy-tuloy na paglaganap ng mga gumagawa, nagbebenta at gumagamit ng droga.
Kung mayrong problema, mayroong solusyon. At hindi basta solusyon dahil dapat lumaban ang lahat at ipagtanggol nila ang sarili at ang iba.
Lipulin ang mga nagtatanim, gumagamit at nagbebenta ng anumang droga. Dapat mawala na ang salot ng droga hindi lang sa ilang bahagi ng kapuluan kundi sa buong bansa. Hindi sapat na pag-isipan at lutasin sa mahinahon at maingat na pinag-isipang paraan ang problema. Dapat mabilis maski na marahas ang solusyon. Hindi na mahalaga ang dangal at karapatan ng itinuturing na pinagmumulan ng problema. “Hindi mga tao, mga animal ang problema!”
Kung animal na sakit at kapahamakan ang idinudulot sa lipunan, dapat lipulin ang mga ito tulad ng ginagawa ng buong bayan ng Florida sa mga “Burmese Pythons” (sawang galing sa Burma) na naging peste na. Nagbigay na ng pahintulot na patayin ang lahat ng makita’t mahuling “Burmese Pythons” dahil naging peste o salot ang mga ito.
Nakakatakot ang ganitong pananaw na basta na lang sasabihin na animal, hindi tao. Parang mga “ipis” ang mga iyan kaya’t hindi kailangang magdalawang-isip at mag-ingat na baka maabuso ang anumang dangal at karapatan.
Mapanganib din ang ganitong pag-iisip dahil sa hayagang pagbabalewala sa dangal at karapatan ng mga miyembro ng sektor na itinuturing na problema. Sa maraming bansa nga, kasama na ang ating bansa, kinikilala na rin ang karapatan ng mga hayop (animal rights). Wala tayong karapatang saktan at abusuhin ang sinuman at anuman (hindi tao, hayop, bahagi ng kalikasan) tulad ng tubig, lupa, kabundukan, mga puno at halaman, hangin, isda, at iba pa.
Ito ang problema ng konsepto ng “giyera” tulad ng “giyera laban sa droga” o “war on drugs.” Kung may giyera, merong “collateral damage” o ang hindi sinasadyang nasira o napatay na gamit o buhay na natamaan ng bala, bomba, nabagsakan, nasunog, nasira dahil normal ito sa isang giyera. Normal at hindi sinasadya ang “collateral damage.”
Mali naman ang pag-iisip na ganito, dahil mayroong iba’t ibang batas, patakaran na tinatawag na “convention” na maski na giyera ay dapat pa ring sundin. Ang “Gineva Convention” na sumasaklaw sa mga batas o patakaran na dapat sundin ng lahat ng panig sa anumang giyera. Ito ang “Humanitarian Law of Armed Conflicts” na kinikilala at iniingatan ang karapatan at kapakanan ng lahat sa gitna ng giyera.
Marami nang giyera sa mundo. Huwag na nating dagdagan. Huwag nating payagang may lumikha ng giyera at nagpapalaganap nito. Kapayapaan at hindi giyera ang kailangan ng lahat. Panalangin, pag-uusap, nagkakaisang mapayapang pagkilos para sa kapayapaan ang higit na kailangan.