Kahulugan ng pinilit maglakad kahit madilim ang daan

ni Estrellia de Luna @Panaginip gabay ng buhay | Pebrero 1, 2023

Analisahin natin ang panaginip na ipinadala ni George ng Masbate.

Dear Maestra,

Napanaginipan ko na nasa isang lugar ako na napakadilim, tapos halos hindi ko na makita ang daraanan ko, pero pinilit ko pa ring maglakad. Buti na lang, unti-unti kong nabanaagan ang kislap ng liwanag sa dako pa roon.

Ano ang ibig sabihin ng panaginip ko?

Naghihintay,

George

Sa iyo, George,

Ang panaginip mo na nasa isang lugar ka na napakadilim, halos hindi mo na makita ang daraanan mo ay nagpapahiwatig na kailangan mo nang hingin ang tulong ng mga pinagkakatiwalaan mong kaibigan. Huwag kang mag-atubiling sabihin sa kanila ang pangangailangan mo at tiyak na tutulungan ka nila sa abot ng kanilang makakaya.

Samantala, ang nakatanaw ka ng kislap ng liwanag sa dako pa roon habang naglalakad ay nangangahulugan na may matatanggap kang magandang balita mula sa malayong lugar.

Matapat na sumasaiyo,

Maestra Estrellia de Luna