Kahulugan ng pera sa panaginip: pera at kayamanan

ni Estrellia de Luna - @Panaginip gabay ng buhay | July 04, 2021

Analisahin natin ang panaginip na ipinadala ni Flor ng Pampanga.

Dear Maestra,

Pangkaraniwan lang ang buhay namin at minsan ay kinakapos din. Kaya naman nangangarap ako na yumaman at maging punumpuno ng kasaganaan ang aming buhay, na lahat ng gustong bilhin ay kaya naming bilhin kahit mahal, na ang hapag kainan ay punumpuno ng masasarap na pagkain at mamahaling prutas.

Araw-araw akong bumibili ng BULGAR at tagahanga ako ng column n’yo tungkol sa kahulugan ng panaginip. Gusto kong malaman ang kahulugan ng aking panaginip tungkol sa tito ko. Matagal na siyang patay pero napanaginipan ko siya na pinagmultuhan ako. Inabutan niya ako ng pera at nang tingnan ko kung magkano ‘yung ibinigay niya sa akin, P100 ang halaga. Tapos napansin ko na may pasan siyang sako at sa tingin ko ay punumpuno ‘yun ng pera. Ano ang ibig sabihin nito?

Naghihintay,

Flor

Sa iyo, Flor,

Sa pangkalahatan, ang kahulugan ng pera sa panaginip ay kasaganaan at kayamanan. Yayaman ka na at sasagana ang pamumuhay, gayundin, mahahango ka na sa kasalukuyan mong kalagayan at aangat na ang iyong pamumuhay at sa wakas, matutupad na ang pangarap mong yumaman.

Gayunman, dahil ang tiyuhin mo ay patay na at ayon sa panaginip mo ay pinagmultuhan ka, ang ibig sabihin nito ay ingatan mo ang relasyon mo sa iyong mga mahal sa buhay tulad ng pamilya at mga pinagkakatiwalaan mong kaibigan. Nagbababala ito na may alitan o hindi pagkakasundo na maaaring maganap sa pagitan n’yo ng naturang mga tao.

Hindi mo nabanggit kung kinausap ka ng tito mo sa iyong panaginip. Ngunit kung nagsalita siya sa iyo, ang ibig sabihin nito ay dapat mong sundin at ipatupad ang anumang ibinilin o sinabi niya sa iyo.

Matapat na sumasaiyo,

Maestra Estrellia de Luna