Kahulugan ng kinagat ng langgam

ni Estrellia de Luna - @Panaginip gabay ng buhay | December 23, 2021

Analisahin natin ang panaginip na ipinadala ni July ng Batangas.

Dear Maestra,

Merry Christmas sa inyo at sa inyong mga mahal sa buhay.

Napanaginipan ko na naglalakad ako sa ilalim ng memorial arch nang biglang kinagat ako ng langgam, tapos masakit at makati ang kagat nito. Ano ang ibig sabihin ng panaginip ko?

Naghihintay,

July

Sa iyo, July,

Ang ibig sabihin ng naglalakad ka sa ilalim ng memorial arch ay babala ng mga kabiguan na maaari mong sapitin kung patuloy kang magpapadalos-dalos sa buhay.

Kaya hinay-hinay lang, mag-isip ka muna ng pitong beses bago pumasok sa isang deal, lalo na kung may kaugnayan ito sa negosyo.

Samantala, ‘yun namang nakagat ka ng langgam ay nagpapahiwatig na kailangang magtrabaho ka nang dibdiban, buong tiyaga at kasipagan para makamit ang inaasahan mong tagumpay. Ito rin ay nangangahulugan na daranas ka ng mabibigat na alalahanin at pagkabahala sa buhay.

Matapat na sumasaiyo,

Maestra Estrellia De Luna