Kahulugan ng iba’t ibang kulay ng ahas

ni Estrellia de Luna @Panaginip gabay ng buhay | March 9, 2023

Analisahin natin ang panaginip na ipinadala ni Kevin ng Tarlac.

Dear Maestra,

Bigla akong nagising dahil sa aking panaginip na itim na ahas. Hindi ito ang una dahil minsan ay nanananginip ako ng puti at green na ahas.

Sa aking panaginip, may kasama ako at naglalakad kami, tapos may nakita akong itim na ahas na kumakain ng pagong. Tinanong ko ‘yung kasama ko kung paano kinain ng ahas ‘yung pagong, at kung hindi man lang ba nasugatan ‘yung ahas dahil malaki ‘yung pagong tapos gumagalaw pa ito sa loob ng ahas. At ang pagkakatanda ko ay halos kasing laki ng braso ko ‘yung ahas.

Ano ang kahulugan ng panaginip ko?

Naghihintay,

Kevin

Sa iyo, Kevin,

Ang ahas ay sumisimbolo ng kaaway. May mga lihim kang kaaway at sobrang inggit sila sa ‘yo. Ang puti ay nagkukunwaring banal o sobrang madasalin, pero kunwari lang ‘yun.

Madumi rin ang budhi niya at may kinikimkim na galit sa puso. Ang kulay itim ay kabaligtaran ang kahulugan, masayahin siya at mababang loob, pero inggitera. Habang ang berde ay mukhang pera, mahilig sa luho at materyal na mga bagay, kumbaga, more on material than spiritual.

Samantala, ang may kasama kang naglalakad at may nakita kang ahas na kinain ‘yung pagong ay nagpapahiwatig na nand’yan lang sa paligid ang lihim mong kaaway. Palagi mo siyang kasama kapag may lakad kayo. Gayunman, huwag kang mag-alala dahil anuman ang iniisip niyang hindi maganda laban sa iyo ay hindi mangyayari dahil kayang-kaya mo siyang talunin sa pamamagitan ng matinding pagdarasal.

Sumasaiyo ang banal na Espiritu, kaya hindi ka dapat mangamba. Protektado ka ng Diyos Ama sa langit.

Matapat na sumasaiyo,

Maestra Estrellia de Luna