Jeep sumalpok sa bus, 18 nadale

ni Jeff Tumbado @News | July 16, 2026

Photo: Circulated / Dinalupihan MPS

Tinatayang aabot sa 18 pasahero ang sugatan matapos sumalpok ang pampasaherong jeep sa nakahintong bus bago bumangga pa sa konkretong poste ng kuryente sa Brgy. Roosevelt, Dinalupihan, Bataan, noong Martes ng gabi.

Ayon kay Bataan Provincial Police Office (BPPO) Director Col. Marites Salvadora, bumibiyahe ang jeep mula Olongapo City patungong Dinalupihan nang mawalan umano ito ng preno.

Diretsong bumangga ito sa kaliwang likurang bahagi ng nakahintong Victory Liner bus bago sumalpok sa poste ng kuryente ng PENELCO at bakod ng isang kalapit na bahay.

Dinala sa J.C. Payumo Memorial Hospital ang drayber ng jeep at ang 17 nitong pasahero upang malapatan ng lunas.

Wala namang naitalang malubhang nasugatan o nasawi sa insidente habang walang pasaherong sakay ng Victory Liner bus ang nadamay.

Sinampahan na ng reklamong reckless imprudence resulting in multiple physical injuries and damage to property ang drayber ng jeep.