Inggit sa bff na maganda, mayaman at maraming manliligaw, babala na magiging karibal

ni Estrellia de Luna @Panaginip gabay ng buhay | March 16, 2023

Analisahin natin ang panaginip na ipinadala ni Lourdes ng Taguig.

Dear Maestra,

Magandang araw sa inyo.

Napanaginipan ko na inggit na inggit ako sa best friend ko dahil bukod sa maganda ay mayaman pa siya at maraming lalaki ang nag-uunahang maging dyowa niya. Pero sa kabilang dako, mayroon din akong mga kaibigan na naiinggit sa akin dahil matalino ako at maganda sa kanilang paningin. Gayunman, hindi ko sila pinapansin.

Ano ang ibig sabihin ng psnaginip ko?

Naghihintay,

Lourdes

Sa iyo, Lourdes,

Ang panaginip mo na inggit na inggit ka sa best friend mo dahil sa bukod sa maganda at mayaman siya, marami ring lalaki na nag-uunahang maging dyowa niya ay nagpapahiwatig na magiging karibal mo siya sa pagmamahal ng karelasyon mo. Gayunman, ikaw pa rin ang magtatagumpay dahil hindi niya maaakit ang karelasyon mo, gaanuman katindi ang pang-aakit niya.

Samantala, ang ibig sabihin ng marami ring naiinggit sa iyo dahil matalino at maganda ka sa paningin nila ay hahangaan ka at kikilalanin ng mga taong nakapaligid sa iyo saan ka man pumunta. Marami kang magiging tagahanga at manliligaw kahit mayroon ka nang karelasyon sa kasalukuyan.

Matapat na sumasaiyo,

Maestra Estrellia de Luna