Indiscriminate firing, ‘wag naman sanang dumagdag pa sa pandemya

@Editorial | December 27, 2020

Inaalam na ng mga awtoridad kung sino ang responsable sa pagpapaputok ng baril sa General Santos City, na sinasabing unang kaso ng ligaw na bala.

Tinitingnan na umano ang trajectory ng hindi pa mabatid na kalibre ng baril. Kung ito ay nanggaling sa lisensiyadong armas, madali itong matutunton.

Napag-alamang hindi na naglagay ng masking tape sa mga baril ang pulisya ng lungsod dahil ilang taon na umanong walang kaso ng indiscriminate firing sa lungsod.

Kinumpirma naman ng opisyal na walang tinamaan sa nasabing ligaw na bala.

Palaging ipinaaalala ng mga awtoridad lalo na ‘pag papalapit na ang pagsalubong sa Bagong Taon na huwag magpapaputok ng baril kung hindi kinakailangan. Gayunman, sadyang may mga matitigas ang ulo na walang pakialam, basta mapairal ang kayabangan o biglang nawawala sa katinuan.

Sana naman ay huwag nang dumagdag itong mga pasaway. Pinipilit na nating mairaos ang 2020 nang hindi na dumaranas ng panibagong problema.

Pakiusap din natin sa mga nasa gobyerno, dahil hindi naman kontrolado ang utak ng mga taong may baril, ihanda na rin ang mas mabigat na parusa laban sa kanila. Tama na ‘yung taun-taon na may nabibiktima ng walang habas na pagpapaputok ng baril. Salubungin naman natin ang Bagong Taon nang mapayapa.