Ilegal na minahan, buking... 7 tigok sa gas poisoning

by Jeff Tumbado @News | October 3, 2026

Photo: Gas poisoning sa minahan - Benguet PRO

Patay ang pitong lalaki matapos umanong malason sa singaw ng gas habang nagmimina sa isang tunnel sa Sitio Dalicno, Brgy. Ampucao, Itogon, Benguet nitong Miyerkules, Setyembre 30.

Nakilala ang mga nasawi na sina Bryan Campos Madrid, 18; Kenjie Igaan Mangayen, 19; Orviel Kiwingan Valdez, 22; Crisanto Igaan Gapacan Jr., 19; Hill Limong Padon, 25; Alvin Lazaro Daniel, 21; at Leonardo Bacuteng Pino, 62.

Unang nakatanggap ng impormasyon ang ilang minero na kasamahan ng mga biktima ilang sandali nang mangyari ang pagkaka-trap nila sa tunnel matapos umanong makalanghap ng nakalalasong gas.

Alas-11 ng umaga nitong Huwebes nang marekober ng mga emergency responder ang labi ng mga biktima.

Samantala, sinabi ni MDRRMO head Engr. Cyril Batcagan na wala umanong alam ang lokal na pamahalaan sa aktibidad ng pagmimina sa nasabing tunnel. Inilarawan umano ang operasyon bilang ilegal na small-scale mining.