Ilang mining companies na ipinasara ni Lopez, balik-operasyon na

ni Thea Janica Teh | July 22, 2020

Kinumpirma ni Environment Secretary Roy Cimatu na may ilang mining companies ang papayagan ulit magbalik-operasyon matapos itong suspendihin at ipasara ng yumaong si Regina Paz Lopez.

Ibinahagi ni Cimatu sa virtual press ng pre-SONA forum na tapos ng inspeksiyunin ng audit team ng Department of Environment and Natural Resources (DENR) at naghanda na ng rekomendasyon.

Ayon kay Cimatu, papayagan lamang magbalik-operasyon ang dumaan sa proper review at nagpasa ng motion for reconsideration sa DENR.

Noong 2017, inilunsad ni Lopez ang anti-mining kung saan sususpendihin at ipasasara ang mga mining activity ng 26 firm na kalaunan ay naging resulta ng kontrobersyal na industry-wide environmental audit ng DENR.

Sa taong 2018, tiningnan muli ng DENR sa pangunguna ni Cimatu ang mga ipinasara ni Lopez. Ito ay ang AAMPHIL Natural Resources and Exploration and Development Corp., Carrascal Nickel Corp., Emir Mineral Resources, Krominco Inc., Libjo Mining Corp., Mt. Sinai Exploration and Development Corp., Strong Built Mining Development, Wellex Mining Corp. 1&2 at Zambales Diversified Metals Corp. Kasama rin dito ang Claver Mineral Development Corp., Ore Mining and Development Corp. at Oriental Synergy Mining Corp.

Sinisigurado naman ni Cimatu na ang babalik lamang sa operasyon ay mga kompanyang sumunod sa mga patakaran at nakapagpasa ng mga dokumento.