ni Kuya Win Gatchalian @Win Tayong Lahat | May 7, 2024
Agresibong pagbabalik sa dating school calendar o ang pagsisimula ng klase tuwing buwan ng Hunyo — ‘yan ang kailangan natin ngayon para maprotektahan ang mga mag-aaral sa gitna ng patuloy na nagbabagong panahon, kabilang na ang napakatinding init.
Mahirap tukuyin ang mga maaaring mangyari kaya mahalagang gawin nating agresibo ang pagpapatupad nito. Hindi natin alam kung sa susunod na taon ay magkaroon ulit ng El Niño o La Niña at hindi ito magiging madali para sa ating mga mag-aaral, magulang, at paaralan.
Sa pinakahuling isinagawang pagdinig ng Senate Committee on Basic Education noong isang linggo, sinabi ni DepEd Assistant Secretary for Operations Cesar Bringas na nagbigay ang ahensya ng iba pang mga mungkahi kay Pangulong Ferdinand Marcos, Jr., kabilang na rito ang agresibong alternatibo na wakasan ang School Year 2024-2025 sa Marso 2025.
Matapos ang konsultasyon sa iba’t ibang mga stakeholder, inusog ng Department of Education (DepEd) ang pagwawakas ng School Year (SY) 2023-2024 sa darating na Mayo 31. Nakatakda naman sa May 16, 2025 ang pagwawakas ng SY 2024-2025, habang magwawakas naman sa Abril 16, 2026 ang SY 2025-2026. Ang ganap na pagbabalik sa dating school calendar ay babagsak sa SY 2026-2027 kung saan muling magsisimula ang klase sa gitna ng Hunyo 2026 at matatapos sa Marso 2027.
Sa planong pagbabalik sa dating school calendar, balak ng DepEd ang pagpapatupad ng mas kaunting araw para sa face-to-face classes habang gagamit naman ng Alternative Delivery Modes (ADMs) tulad ng online, modular, o blended learning sa ibang mga araw — pati ang mga Sabado. Ngunit mangangahulugan ito na maaaring maapektuhan ang bakasyon ng ating mga mag-aaral at guro sakaling maging agresibo ang pagbabalik sa dating school calendar.
Sa parehong pagdinig ay ibinahagi naman ng Philippine Atmospheric, Geophysical and Astronomical Services Administration (PAGASA) ang pros and cons, kung saan mas kaunti ang mga araw na tumatapat sa tag-ulan sa kasalukuyang school calendar at mas kaunti ang suspensyon ng mga klase dahil sa mga bagyo. Pero mas marami namang mga araw na natatapat ang klase sa matinding init.
Bago pa tayo dumanas ng matinding init na panahon, masyado nang mabigat ang mga pinagdaanan ng ating mga kabataang mag-aaral noong kasagsagan ng pandemya.
Kailangan nating gawin ang lahat ng wastong mga hakbang upang masolusyunan ang ganitong hadlang sa edukasyon ng mga bata.
May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City
o mag-email sa surewin.bulgar@gmail.com