Hirit ng mga cong. para sa minimum wage families... P1K kada buwan, pang-grocery

ni Mervin Reyes @News | August 7, 2026

Photo: FB / Tingog Party-list Rep. Jude Acidre / HOR

Inihain ng 11 mambabatas sa House of Representatives ang House Bill No. 10648 o PAMANA Act, na naglalayong magbigay ng P1,000 buwanang subsidiya o P12,000 kada taon sa mga minimum wage families na hindi benepisyaryo ng 4Ps.

Ang ayuda ay ipapadala sa pamamagitan ng PhilSys-linked digital wallet at maaari lamang gamitin sa pagbili ng mga produkto mula sa mga akreditadong MSMEs tulad ng sari-sari stores, palengke, karinderya, groceries, at botika. May P200 daily spending limit at hindi ito maaaring i-withdraw bilang cash.

Ayon kay Tingog Party-list Rep. Jude Acidre, “Many minimum wage earners report for work every day but still struggle to meet the cost of food, transportation, utilities, medicine, and other basic needs.”

Tinatayang mangangailangan ang panukala ng P64 bilyon hanggang P68 bilyon kada taon, na popondohan sa pamamagitan ng PAMANA Trust Fund.