Habal-habal driver, kulong sa P6.8M shabu

ni Mai Ancheta @News | August 6, 2026

Photo: File

Arestado ang 25-anyos na habal-habal driver makaraang maaresto sa isang buy-bust operation nitong Martes, Agosto 4, sa Brgy. Guadalupe, Cebu City.

Kinilala ni Philippine Drug Enforcement  Agency Region 7 Director Joel Plaza ang suspect na si alyas Ryan.

Nasamsam sa suspek ang 40 malalaking pakete ng hinihinalang shabu na tumitimbang ng halos isang kilo na may street value na P6.8 milyon.

Bago nahuli ang suspek ay isinailalim ito ng mga awtoridad sa anim na linggong pagmamanman matapos makatanggap ng impormasyon na sangkot ito sa pagbebenta ng ilegal na droga.

May kakayahan umano ang suspek na makapagbenta ng isang kilo ng shabu kada linggo.

Nabatid ng PDEA 7 na naaresto na si “Ryan” sa kahalintulad na kaso noong 2023 at muling binalikan ang ilegal na trabaho matapos makalabas sa kulungan.