Generic brands ng gamot, epektibo rin tulad ng branded — pharma groups

ni Jasmin Joy Evangelista | January 9, 2022

Dahil sa pagtaas ng demand sa mga gamot gaya ng paracetamol at iba pang gamot na panlaban sa sintomas ng trangkaso at COVID-19, hinikayat ng mga grupo ng pharmacists ang publiko na bumili muna ng generic brands.

“Based sa survey namin wala pong shortage ng Paracetamol, meron tayong shortage sa mga specific na brand, 'yun lang po 'yung mga kilala ng mga tao pero over all marami po tayong generic equivalent na makikita sa botika," ani Jovelyn Blancaflor, chairman of the board ng Drugstore's Association of the Philippines. 

Ayon naman kay Dr. Janette Jakosalem ng Pharmaceutical and Healthcare Association of the Philippines, pareho lang ng bisa ang branded at generic kaya hindi dapat matakot ang publiko sa pagbili ng generic brand.

“Pareho lang po ang effectivity niyan, sinisigurado naman ng FDA natin na hindi nila ia-approve 'yung pagbenta ng mga gamot kung hindi iyan dumaan sa masusing testing. Ang generic, 'yung walang brand is equally as effective as 'yung mga branded," ani Jakosalem.