Ganern, Julia?... KIM, NATAMEME NANG TUKSUHIN ULI KAY GERALD

ni Vinia Vivar - @Frankly Speaking | March 9, 2021

Abut-abot na pang-aalaska’t pangangantiyaw na naman ang naranasan ni Kim Chiu mula sa mga co-hosts ng It’s Showtime sa pangunguna ni Vice Ganda. Timing naman kasi ang pagge-guest ng komedyanteng si Jerald Napoles bilang hurado sa Versus segment.

Nang i-introduce ni Vice si Jerald, sey niya sa theater actor/comedian, “Oy, Jerald, napanood ko ‘yung interview mo kay Tito Boy, ha? Pasabog ka, ha?”

Siyempre, ang tinutukoy ni Vice ay si Gerald Anderson na umamin nga sa relasyon nila ni Julia Barretto sa tell-all interview with Boy Abunda.

Sumakay naman si Jerald at aniya, “20 minutes din ‘yun, 'no?”

Tawanan sina Vice at Jhong Hilario.

“Ang dami kasing nagta-tag sa akin. Ganu’n na pala ‘yung hitsura ko ngayon,” sey pa ni Jerald.

Isa rin si Kim sa mga hurado kaya nang ipakilala siya, tanong ni Vice sa kanya, “Happy naman kayo ni Jerald diyan?”

Na-speechless muna si Kim for a while bago sinabing “Ayokong sumali d'yan” sa pag-aakalang si Gerald ang itinatanong sa kanya.

Ikinorek naman ni Vice at sinabing “Kayo ni Jerald, happy kayo ni Jerald diyan?”

Saka pa lang nakasagot si Kim, “Happy kami rito ni Jerald at saka ni Roxanne (Guinoo, isa rin sa mga hurado).”

Tawa nang tawa si Vice at kantiyaw niya, “Obvious, ah.”

Nakisakay na rin si Roxanne at sey niya, “Kimerald pala ‘to, Kimerald.”

Tawa pa rin nang tawa si Vice Ganda na halatang nambubuwisit talaga.