Gamot kontra-leptospirosis, tiyaking 'di mauubos

by Info @Editorial | August 19, 2026

Sa gitna ng malawakang pagbaha dulot ng habagat, maraming Pilipino ang napipilitang lumusong sa maruming tubig. Kasabay nito ang banta ng leptospirosis, kaya mas tumataas ang pangangailangan sa konsultasyon at gamot gaya ng doxycycline. 

Nag-utos na rin ang Department of Health (DOH) ng leptospirosis fast lanes at sapat na supply nito sa mga pampublikong ospital.

Nakaaalarma kung may mga health facility na makararanas ng pagkaubos ng gamot habang patuloy ang pagbaha. Kaya dapat tiyakin ng DOH at mga lokal na pamahalaan na may sapat na reserbang gamot at mabilis na replenishment sa mga ospital at health center. Hindi dapat makarating sa puntong naghahanap na lamang kung saan may natitirang supply ang mga nangangailangan.

Hindi rin dapat basta uminom ng doxycycline nang walang payo ng doktor. Ngunit tungkulin ng gobyerno na tiyaking kapag kailangan at nireseta ito, may gamot na agad na maibibigay. 

Sa gitna ng habagat at baha, ang sapat na supply ay hindi lamang usapin ng imbentaryo—proteksiyon ito sa buhay.