Fashion designer Brian Tenorio, pumanaw na

ni Thea Janica Teh | July 28, 2020

Inanunsiyo sa isang Facebook Post ng Communication Design Association of the Philippines (CDAP) na pumanaw na ngayong Martes, July 28 ang kanilang founding board member na si Brian Tenorio.

"Brian never fails to bring energy to meetings and discussions. He was always overflowing with creative ideas. The industry lost one of it's champions," bahagi ni CDAP President Jowee Alviar.

Nakilala si Tenorio sa pagiging designer hindi lang sa fashion kundi pati na rin sa graphic design. Siya ay nakapagtapos ng pag-aaral sa Pratt Institute sa New York at branding consultant ng ilang grupo tulad ng Asian Development Bank (ADB) at World Health Organization (WHO). Mayroon din itong sariling shoe line, ang Tenorio Manila.

Bukod pa rito, nakilala rin si Tenorio sa kaniyang adbokasiya na nagpapakilala sa local businesses at brand ng Pilipinas. Siya rin ang nanguna sa coffee venture na KapeTayo na pagpapakilala sa Philippine coffee beans at native snack.

Si Brian Tenorio rin ang chair ng Philippine LGBT Chamber of Commerce na sumusuporta sa mga negosyo ng LGBT.