Gintong medalya kay Eala, matapos ang 26 taon ng SEAG

ni Gerard Arce @Sports | December 18, 2025

Photo: POC Media

Tinapos ni Alexandra “Alex” Eala ang 26-taong pagkagutom sa gintong medalya ng Pilipinas sa larangan ng women’s tennis matapos pataubin ang hometown bet na si Manachaya Sawangkaew sa iskor na 6-1, 6-2 sa championship round ng singles event kahapon sa 33^rd Southeast Asian Games sa National Tennis Development Centre sa Nonthaburi, Thailand.

Napantayan ni Eala ang ginawa noon ni Maricris Fernandez-Gentz noong 1999 Brunei Darussalam Games bilang ikalawang Pinay na nagwagi ng gold medal sa naturang event, habang nakamit nito ang ikatlong medalya ngayong 2025 edisyon sa karagdagang dalawang tansong medalya sa Mixed Doubles kasama si Francis Casey Alcantara at sa women’s Team Event kasama sina Stefi Marithe Aludo, Alexa Joy Milliam, Tennielle Madis at Shaira Hope Rivera.

Maagang pinainit ng 20-anyos na left-handed ang laro sa first set ng maagang kunin ang 3-0 bentahe, bagaman naka-iskor ng isa ang Thai tennister, nagpatuloy pa rin sa pananalasa sa naturang set si Eala para sa 1-0 bentahe hanggang 'di  nagpatinag ang 5-foot-9 smasher para kunin ang apat na sunod na laro tungo sa makasaysayang panalo.

Ang Pinay World No.52 ang ikatlong Pinay na nagwagi ng gold medal sa biennial meet matapos mapagwagian ni Pia Tamayo ang unang ginto noong1981 Manila Games at matapos ang 8 SEA Games ay sinundan ito ni Fernandez. 

Tatlong Pinay ang nabiting makakuha ng ginto sa magkakahiwalay na women’s singles mula kina Marisa Sanchez noong 1977 Kuala Lumpur Games, Evangeline Olivarez sa 1993 Singapore meet at Anna Clarice Patrimonio sa 2017 Kuala Lumpur, habang nakapagbulsa ng bronze medals sina Eala, Patrimonio, Riza Zalameda, Katharina Lehnert at kasalukuyang women’s head coach Denise Dy.

Nasundan ni Eala ang huling gintong medalya ng Pinas noong 2023 Cambodia Games sa tambalan nina Francis Alcantara at Ruben Gonzales sa men’s doubles, habang ang huling nanaig ng singles sa men’s si Cecil Mamiit, na kinumpleto ang three-peat mula 2005 Manila, 2007 Nakhon Ratchasima at 2009 Vientiane sa Laos. 

---

FIRST SEA GAMES TENNIS GOLD IN 26 YEARS!

Inangkin ni Alex Eala ang gold medal sa SEA Games 2025, matapos talunin ang pambato ng host na Thailand na si Mananchaya Sawangkaew sa tennis women’s singles.