Dinalaw ni VP Sara... Marcoleta, hindi 'fit' humarap sa trial

ni Jeff Tumbado @News | July 8, 2026

Photo: Rodante Marcoleta - FB

Itinuturing na “not fit to stand trial” si Senador Rodante Marcoleta matapos makaranas ng pananakit ng dibdib at leeg kasunod ng kanyang pag-aresto noong Lunes, Hulyo 6, ayon sa Philippine National Police Health Service.

Sinabi ni Police Lt. Col. Benaly Bayani, hepe ng Internal Medicine Department ng PNP Health Service, na nananatiling naka-confine si Marcoleta sa PNP General Hospital at sumasailalim sa iba't ibang laboratory tests para sa masusing pagsusuri ng kanyang kalagayan.

Ayon kay Bayani, hindi pa rin stable ang blood pressure ng 72-anyos na senador, bagama't maituturing na clinically stable ang kanyang kondisyon dahil paminsan-minsan lamang lumalabas ang kanyang mga sintomas.

Sinabi rin ni Bayani na umabot sa 140/90 ang blood pressure ni Marcoleta.

Patuloy na mino-monitor ng mga doktor ang pabagu-bagong blood pressure ng senador at ang kanyang mga nararanasang paninikip ng dibdib habang nananatili siyang naka-confine sa PNP General Hospital.

Nauna nang sinabi ni Interior Secretary Jonvic Remulla, na maaaring tumagal ng humigit-kumulang dalawang araw ang mga kinakailangang medical procedure bago maiharap si Marcoleta sa anti-graft court para sa pagbabalik ng warrant at paglalabas ng commitment order kaugnay ng kanyang detensyon.

Samantala, binisita ni VP Sara Duterte si Marcoleta sa PNP General Hospital alas-7:43 ng umaga nitong Martes, Hulyo 7.

Sa ngayon, nananatili si Marcoleta sa ilalim ng mahigpit na obserbasyon habang hinihintay ng mga doktor ang resulta ng kanyang mga pagsusuri at karagdagang medical assessment.