DEREK, PINAGPAPALIWANAG NG LTO SA FAKE PLATE NG SUPERCAR NIYA, TAMEME

ni Janiz Navida @Showbiz Special | August 15, 2026

Photo: IG @ramsayderek07

Palaisipan nu’ng una kung sino ang aktor at negosyanteng tinutukoy ng Land Transportation Office (LTO) na may-ari ng supercar na gumamit ng pekeng plaka kaya sinuspinde umano ang lisensiya ng driver habang in-impound naman ang naturang sasakyan.

Nang maglabas kasi ng direktiba ang LTO Chief na si Assistant Secretary Markus V. Lacanilao na inisyuhan ng Show Cause Order (SCO) ang rehistradong may-ari at itinalagang drayber ng isang supercar matapos matukoy na gumagamit ito ng pekeng plaka habang bumibiyahe sa pampublikong kalsada, hindi pinangalanan ang subject.

Sa isinagawang beripikasyon ng LTO, natukoy na ang plate number na ginagamit ng naturang sasakyan ay may ibang alphanumeric combination kumpara sa orihinal na motor vehicle license plate number na nakatalaga rito. 

Kaugnay nito, inatasan ang rehistradong may-ari at itinalagang drayber na humarap sa Intelligence and Investigation Division (IID) at magsumite ng beripikado o sinumpaang paliwanag kaugnay ng posibleng paglabag sa Use of Number Plates, gayundin upang ipaliwanag kung bakit hindi dapat suspendihin o bawiin ang kanilang lisensiya dahil sa pagiging Improper Person to Operate a Motor Vehicle.

Samantala, isinailalim sa 90-araw na preventive suspension ang driver’s license ng itinalagang drayber at inatasang isuko ito sa IID. Ang naturang supercar ay inilagay din sa alarm status, at inatasan ang Law Enforcement Service (LES) na ipatupad ang pag-impound sa nasabing sasakyan.

Pahayag ni Asec. Lacanilao, “Walang VIP sa pagpapatupad ng batas. Kahit sino pa ang sangkot, kapag napatunayang lumabag, haharap sa kaukulang pananagutan. Hindi magdadalawang-isip ang LTO na kumilos laban sa sinumang lalabag sa ating mga patakaran. Walang palakasan, walang palusot, at walang exemption. Ang paggamit ng pekeng plaka at pag-iwas sa mga obligasyong dapat tuparin ay hindi pinapalampas ng LTO.”

Bagama’t walang tinukoy ang LTO chief, pinangalanan naman sa artikulong inilabas ng Bilyonaryo.com ang aktor na si Derek Ramsay na siyang may-ari ng naturang supercar.

Sinubukan naming kunin ang panig ni Derek kaya ipinadala namin sa kanya sa pamamagitan ng Facebook Messenger ang link ng naturang balita na lumabas online.

Gayunpaman, wala kaming natanggap na sagot mula sa aktor, bagama’t nakita naming ‘seen’ naman niya ang aming mensahe.

Inisip na lang naming hindi pa handang magbigay ng statement sa ngayon si Derek at baka kumonsulta muna ng lawyer bago maglabas ng anumang pahayag kaugnay ng isyu. 

Pero anumang oras, bukas ang aming pahayagan para sa kanyang panig.

---

Nasa’n ang hustisya? GUWAPONG AKTOR, BINIGYAN NG MAMAHALING KOTSE NG RICH SUGAR MOMMY, NAHULI NG ANAK, PINABABA

BLIND ITEM:

TOTOONG-TOTOO ang kasabihang “Pera na, naging bato pa!” sa nangyari sa isang guwapong aktor na akala ay naka-jackpot na sa kanyang madatung na sugar mommy, pero ang ending, luhaan pala siyang uuwi.

May ilang buwan na rin ang clandestine affair ng guwapong aktor at ng rich businesswoman na azucarera de mama niya ngayon. 

Sikat at magaling namang umarte ang aktor, pero dahil siguro sa image niyang madalas ma-link sa mga bading, hindi siya mai-push nang husto ng kanyang mother network kaya hindi nagtutuluy-tuloy ang mga projects niya.

Natural, kung wala siyang steady job, saan nga ba siya kukuha ng pambayad sa bills niya? 

So, alam n’yo na kung bakit puwede siya sa bading, puwede rin sa mga girlalu na mas may-edad sa kanya. 

In short, basta may pera at kayang ibigay ang mga needs at luho niya, go na go siya, performance level to the max!

So, eto na nga, tuwang-tuwa ang guwapong aktor dahil may daily supply of food na siya mula sa rich businesswoman, spoiled pa siya kung ano’ng hilingin niya.

One time, habang super enjoy si guwapong aktor sa pagda-drive sa bagong mamahaling kotse na bigay sa kanya ng kanyang azucarera de mama, eh, bigla na lang silang hinarang at pinatigil ng anak na babae ng businesswoman.

Nabukelya pala ng anak ang illicit affair nila at nalamang binigyan siya ng kotse ng madatung nitong mudrakels, kaya ayun, masakit man sa kanyang loob, no choice siya nang pababain sa mamahaling karu!

Aguuuy! Nasaan ang hustisya ngani?!