Caceres at Mangrobang sabak sa Asian Games triathlon event

by Gerard Arce @Sports News | September 19, 2026

Photo: Ang Philippine Triathlon team na sasabak ngayong Linggo sa Asian Games, Nagoya. (TRAP)

Raratsada para sa inaasam na medalya ang five-man Philippine triathlon team na handang-handa sa pagsisimula ng kampanya ngayong Linggo sa 20th Asian Games Aichi-Nagoya na gaganapin sa Gamagori City Triathlon venue sa Aichi Prefecture.

Bitbit ng national squad ang nakuhang karanasan sa mga dinaluhang training camps sa Spain, Indonesia, at China, na ipapamalas ang mas matalas at kargadong mga arsenal upang ipakita ang katatagan at tikas sa event na sisimulan bandang alas-7:30 ng umaga.

"They are all sharp and battle-ready," wika ni Triathlon Philippines President Tom Carrasco. Pangungunahan ni Filipino-Spanish athlete Fernando Casares ang pagiging isang two-time individual Southeast Asian (SEA) Games champion para trangkuhan ang grupo kasama sina Kim Remolino at Inaki Lorbes para sa men's race.

Bibida naman para sa women’s side si four-time SEA Games titlist Kim Mangrobang at raven Alcoseba sa karerang magsisimula sa alas-10:00 ng umaga, kung saan mabigat na hindi makakasama si top bet Kira Ellis, na napilitang iatras matapos magtamo ng injuries dulot ng road accident sa training camp sa France.

Puntirya ng Pinoy trithletes na mahigitan ang 7th place finish sa 2014 ni Claire Adorna at 2018 finish ni Mangrobang, habang sasalang din bukas, Lunes sa Mixed relay event, na sasandal sa momentum mula sa 2025 SEA Games Thailand, kung saan winalis ang gold medals.