CAB, nais amyendahan ang Air Passenger Bill of Rights na angkop sa pandemya ng COVID-19

ni Lolet Abania | August 20, 2020

Pinag-aaralan ng Civil Aeronautics Board (CAB) upang mapahusay at amyendahan ang Air Passenger Bill of Rights (APBR) para maging angkop ito sa nararanasang sitwasyon sa pandemya ng coronavirus o COVID-19 ng bansa.

“Ang Air Passenger Bill of Rights natin ay muli nating pinag aaralan, kasi maraming bagay diyan na dapat sigurong i-revise para maging relevant sa mga current developments,” pahayag ni CAB Executive Director Carmelo Arcilla sa isang virtual briefing.

Dahil sa covid-19 pandemic, natigil ang ilang international at domestic air travel, nagkaroon ng mga flight cancellation at apektado ang libu-libong pasahero, gayundin, may mga na-stranded sa airports. Tanggap naman ng CAB na ang mga flight cancellations ay dahil sa ‘force majeure’ at hindi nagmula sa mga airlines.

“Limited ‘yung responsibility ng airline to refunding pero time and again, ‘yun namang airlines lagi kong sinasabi they rise to the occasion as they extend their support to their passengers kahit na beyond the call of APBR,” sabi ni Arcilla.

“Pero may isang bagay na pinag-aaralan kami kasi nga itong providing care to the passengers when the cancellation is occasioned by force majeure medyo sensitive na issue ‘yan. Kasi we are talking here of passengers, who are vulnerable, so parang pinag-aaralan namin how can we further support or take care of the passengers,” pahayag ni Arcilla.

Gayunman, tinitingnan ng CAB ang paghingi sa mga airline company na mabigyan ng mas malawak na suporta para sa mga pasahero kahit na ang mga flight cancellation ay dahil sa force majeure o iba pang pangyayari na maaaring may kaugnayan sa covid-19 crisis.

“The government and the airlines will have to join hands in going out of their way to support them. Pinag-aaralan po natin yan, siguro sa lalong madaling panahon,” sabi ni Arcilla.

“Under deliberation pa ‘yun kaya ayaw ko muna ibigay ang mga detalye kasi baka ma preempt nga natin. Pero ‘yun nga the passengers are vulnerable and we are looking for more support for passengers at any time, under any circumstances,” dagdag ni Arcilla.

Samantala, naglabas ng listahan kahapon, ang Civil Aviation Authority of the Philippines (CAA) ng mga airport na may clearance sa LGU para sa balik-operasyon ng mga commercial flights.