Buhay ng KOJC founder, isasapelikula… JOHN LLOYD, NAPILI PARA GUMANAP BILANG PASTOR QUIBOLOY

ni Vinia Vivar @Frankly Speaking | September 15, 2024

Nilinaw ni Attorney Ferdinand Topacio na hindi naman niya ipinatatanggal ang pelikula ni Vice Ganda na And The Breadwinner Is… (ATBI) sa 2024 Metro Manila Film Festival (MMFF). 

May naging pahayag kasi si Atty. Topacio na ang movie ni Vice ay kapareho sa isang old Pinoy movie na napanood niya. Ito ay matapos malaglag ang Gringo Honasan Story (GHS) sa first four entries sa MMFF 2024.

Ang GHS ay produced ng Borracho Films ni Atty. Topacio at pagbibidahan ito ni Sen. Robin Padilla.

Ayon sa producer-lawyer sa Pandesal Forum kahapon na ginanap sa Kamuning Bakery, wala naman daw problema sa kanya kung nalaglag man sa first 4 ang biopic ni Gringo dahil ganyan din ang nangyari sa Mamasapano film na ipinrodyus niya rin, pero nakapasok naman daw ito sa last 4 ng MMFF 2022.

“Wala namang problema ‘yun sa ‘kin. Kasi ‘yung Mamasapano, ‘di rin na-approve ang script kaya ginawa naming finished film. Prerogative nila ‘yun. Ang inirereklamo ko, ‘yung script ng kay Vice Ganda.

“Hindi ko sinasabing i-disqualify nila. Bakit nila idi-disqualify? Kaya lang sinabi ko, kung ‘yun ay kinuha ang idea from another movie at ‘yun ang fruit ng activity ng isang writer, i-acknowledge mo naman. Kasi, parehung-pareho naman,” paliwanag ni Atty. Topacio.

Ang pelikula raw na kapareho ng movie ni Vice Ganda ay ang Higit Sa Lahat (HSL) shown in 1955. Napanood daw niya ito mismo sa YouTube (YT).

Kinumpirma na rin niya na hindi na raw nila isasali ang GHS sa MMFF dahil hindi na talaga kakayanin. Ang dahilan, sobrang busy daw talaga ni Robin.

Aniya, “Baka hindi na talaga kami umabot. At sinabi ko rin naman sa kanya, ‘yung schedule talaga ni Senator Robin.

“And we have to understand, ‘yung schedule talaga n’ya. And we have to understand that Sen. Padilla has to prioritize ‘yung kanyang mga tungkulin bilang senator.” 

Aside from Honasan’s bio pic, balak din daw niyang isapelikula ang buhay ni Pastor Apollo Quiboloy ng Kingdom of Jesus Christ (KOJC) noon pa mang hindi pa nangyayari ang mga kontrobersiya at kaso nito.

Si John Lloyd Cruz daw ang napipisil nilang gumanap at kinausap na niya ang aktor tungkol dito. 

“Gusto na muna n’yang mabasa ang script,” aniya nang tanungin kung tinanggap na ba ito ni John Lloyd.

---

ANG bongga ni Belle Mariano dahil sa kabila ng pagiging busy sa kanyang showbiz career ay hindi niya pinabayaan ang pag-aaral at ngayon ay nagbunga na ito dahil nakapagtapos na siya ng kolehiyo. 

Proud na ibinahagi ng aktres ang graduation photos niya at masayang-masaya siya sa bagong milestone na ito ng kanyang buhay.

“Before entering the industry, I promised myself and my parents that I’d do my best to live the best of both worlds: pursuing my career and balancing it with school at the same time,” simula ng caption ni Belle.

Hindi raw madali ang kanyang naging journey bilang working student but it all paid-off in the end.

“Two years ago, I decided to continue pursuing my academics once again. I could say it wasn’t an easy journey (laugh emoji) — all the nights of staying up late, endless cups of coffee (heart emoji), and trying to make it before the deadline. I finally made it (white heart emoji)!” pahayag ng aktres.

Matatandaang nabanggit ni Belle Mariano in her past interview that she was taking up a Psychology degree.