Bike lanes, wa’ ‘wenta dahil sa mga pasaway na motorista

@Editorial | February 10, 2021

Mahigit 600 mga motorista ang hinuli sa isang lungsod dahil sa paggamit at pagharang sa bike lanes.

Sa kanilang Cycling and Active Transport Ordinances, pagmumultahin ang mga motorista na gagamit ng mga bike lanes. Kung saan, multang P1,000 ang ipapataw sa motoristang lalabag sa unang pagkakataon, P3,000 sa second offense at P5,000 para sa third offense. May P300 ding multa sa mga pumapasadang pedicab na gumagamit ng bike lanes o isang araw na community service.

Mahirap bang unawain na ang bike lanes ay para sa mga nakabisikleta?

Ginawa ito para maging ligtas sila lalo na ngayon na mas marami tayong kababayan na nagbibisikleta papasok sa trabaho gawa ng limitasyon sa transportasyon dulot ng pandemya.

Paalala rin sa mga naka-bike, gamitin ang lane na itinalaga sa atin at huwag nang humalo sa ibang sasakyan.

Ang hindi pagsunod sa mga ganito kasimpleng batas ay nakapagdudulot hindi lang ng pagbigat sa daloy ng trapiko kundi panganib din sa ating buhay.

Sa mga sadyang matitigas ang ulo, makakapal ang mukha, huwag n’yo nang hintaying mahuli, magmulta o mapahamak.

Alamin at sundin ang mga batas-trapiko at huwag mamerhuwisyo.