Bigtime rollback, bigtime palusot?

by Info @Editorial | November 12, 2026

Kapag may taas-presyo sa petrolyo, mabilis ang mga gasolinahan sa pagpapatupad. Pero kapag bigtime rollback na, biglang may mga paskil na “out of stock,” habang ang iba naman ay mas maliit ang ibinabawas sa presyong inaasahan ng mga motorista.

Ano ito, nagkataon lamang o may mga gasolinahang nagsasamantala?

Hindi biro ang bawat pisong matitipid ng mga motorista, jeepney driver, delivery rider at ordinaryong manggagawa. 

Sa gitna ng patuloy na pagtaas ng gastusin, malaking ginhawa ang rollback. Kaya nakakainis na sa halip na maramdaman ang buong bawas-presyo, may mga konsyumer pang kailangang maghanap ng gasolinahang may sapat na suplay at mas mababang presyo.

Hindi naman awtomatikong paglabag ang pagkakaroon ng magkakaibang presyo o pagkaubos ng suplay. Pero kung may mga istasyong sadyang nagtatago ng produkto, nanlilinlang sa publiko o lumalabag sa mga umiiral na regulasyon, dapat silang panagutin.

Kailangang kumilos ang Department of Energy. Hindi sapat ang mga anunsyo at paalala. Dapat inspeksyunin ang mga gasolinahan, tiyaking makatotohanan ang mga deklarasyong “out of stock,” at siyasatin kung bakit may mga gas station na hindi nagbibigay ng inaasahang bawas-presyo.

Hindi dapat maging laro ng palusot ang presyo ng petrolyo. Ang rollback ay inaasahang magbibigay ng ginhawa sa publiko, hindi panibagong dahilan para magduda ang mga motorista.