Bigtime oil price hike… P5 sa diesel at P1 sa gasolina, next week

Fni Lolet Abania | August 26, 2022

Asahan ang bigtime oil price hike sa susunod na linggo, partikular sa diesel na posibleng umabot ng P5 kada litro.

Batay sa oil trading sa pandaigdigang merkado mula noong Agosto 22 hanggang 25, ayon sa oil industry source maaaring umabot sa P5.40 hanggang P5.70 kada litro ang itataas sa presyo ng diesel.

Nasa P1.30 hanggang P1.60 kada litro ang presyo ng gasolina.

Kinumpirma naman ni Department of Energy-Oil Industry Management Bureau Director Rino Abad sa isang phone interview, na posibleng umabot sa mahigit P5 kada litro ang itaas sa presyo ng diesel habang nasa tinatayang P1 kada litro sa gasolina.

Ayon kay Abad, kabilang sa nakakaapekto sa galaw ng presyuhan ng krudo sa world market ay ang tumataas na demand sa petrolyo sa United States at Europe na epekto pa rin ng labanan sa pagitan ng Russia at Ukraine.

Kadalasan nang inaanunsyo ng mga kumpanya ng langis ang price adjustment sa mga produktong petrolyo tuwing Lunes habang ipinapatupad ito tuwing Martes.