Balik-work-from-home kontra kumakalat na kaso ng COVID-19

@Editorial | March 20, 2021

Inihirit ng Department of Labor and Employment (DOLE) sa mga employer na muling ipatupad ang work-from-home scheme upang hindi na tumaas pa ang bilang ng kaso ng COVID-19.

Base sa DOLE, nasa 37,434 na ang nagsasagawa ng work-from-home noon pang 2020.

May mga kumpanya na halos nakasabay na sa sitwasyon at tanggap na rin ng mga empleyado ang bagong set-up. Marami ang nagsasabing hindi lang sila nakaiiwas sa banta ng COVID-19, mas nagkaroon pa sila ng panahon sa pamilya.

Bagama’t may iba na hindi talaga umubra ang WFH dahil sa ilang problema, pangunahin na sa internet connection. Habang meron namang hindi talaga puwedeng gawin sa bahay ang trabaho.

Samantala, nais pa rin maipaunawa sa mga employers ang mas malaking tsansa ng hawaan kung ang empleyado nila ay babiyahe pa patungo sa trabaho.

Matatandaang, kamakailan nang sabihin ng Epidemiology and Disease Surveillance Unit (CESU) ng isang LGU na karaniwang nagkakaroon ng hawaan sa pinagtatrabahuan na naiuuwi naman sa pamilya.

Kaya ang paalala sa mga business establishment na hindi talaga kaya ang WFH scheme, ipagpatuloy lang ang prevention, detection, contact tracing, isolation at management strategies sa kumpanya, opisina o tindahan.