Babala na ‘wag magsimula ng bagong negosyo

ni Estrellia de Luna - @Panaginip gabay ng buhay | November 10, 2022

Analisahin natin ang panaginip na ipinadala ni Tommy ng Cavite.

Dear Maestra,

Isa akong businessman. Dati ay malakas ang kita ko, pero simula nang magkaroon ng COVID-19 pandemic ay humina na ang kita at hanggang ngayon ay matumal ang negosyo ko.

Napanaginipan ko na nadamay ako sa kasong isinampa laban sa kapatid ko. Wala naman akong kinalaman sa mga gawain niya, kaya takang-taka ako dahil nadawit ang pangalan ko.

Ano ang ibig sabihin ng panaginip ko?

Naghihintay,

Tommy

Sa iyo, Tommy,

Ang ibig sabihin ng panaginip mo na nadamay ka sa kasong isinampa laban sa kapatid mo ay pagkalugi sa negosyo, kung saan maba-bankrupt ang negosyo mo at mahihirapan kang mabawi ang dati mong kita. Dahil d’yan, dapat kang maging maingat simula ngayon.

Ang panaginip mo ay nagbababala rin na huwag na huwag kang ma-involve muna sa bagong negosyo o kasosyo, gayundin, iwasan mong mangutang sa mga lending company. Huwag ka ring mamuhunan ulit ng malaki dahil may posibilidad na magsisi ka sa huli.

Matapat na sumasaiyo,

Maestra Estrellia de Luna