Babala na magiging biyuda na poreber

ni Estrellia de Luna @Panaginip gabay ng buhay | September 24, 2023

Analisahin natin ang panaginip na ipinadala ni Jojie ng Malabon.

Dear Maestra,

Magandang buhay sa inyong lahat d'yan. Isa ako sa marami n'yong tagasubaybay. Biyuda na ako at nag-iisa na lang sa bahay.

Napanaginipan ko na wala akong magawa kaya naisipan kong maglaro ng baraha, habang binabalasa ko ito, may biglang dumaan na pusa, at may kasunod itong tatlong kuting na ngiyaw nang ngiyaw.

Ano ang ibig sabihin ng panaginip ko?

Naghihintay,

Jojie

Sa iyo, Jojie,

Maraming salamat sa pagsubaybay sa column ko. Ang ibig sabihin ng panaginip mo na wala kang magawa kaya naisipan mong maglaro na lang ng baraha, ay dapat mong bigyang pansin ang kahulugan na ipinahihiwatig ng baraha dahil may posibilidad na maganap ito sa totoong buhay. Ito rin ay nangangahulugang mananatili kang biyuda hanggang sa huling bahagi ng iyong buhay.

Samantala, ang may dumaang pusa habang naglalaro ka ng baraha, ay nagpapahiwatig na hindi tapat ang mga taong nakapaligid sa iyo, at may kinikimkim silang inggit sa iyo.

Ang tatlong kuting naman na ngiyaw nang ngiyaw, ay sign ng kaligayahan. Ang bilang na tatlo, ay tanda na dadaan ka muna sa mga pagsubok bago ka magtagumpay, at handa mong magsakripisyo ang lahat, alang-alang sa mga mahal mo sa buhay. Sa dakong huli, tatanggap ka ng gantimpala, yayaman at kikilalanin ka na rin sa inyong lugar.

Matapat na sumasaiyo,

Maestra Estrellia de Luna