Atty. Bruce Rivera, pinutakti ng batikos dahil sa pang-iismol sa mga abogadong naka-take 2 sa Bar

exam

ni Pablo Hernandez III - @Prangkahan | April 7, 2022

PARANG SINABI NI BBM NA PALPAK ANG PANDEMIC RESPONSE NG DUTERTE GOV’T. — Sabi ni presidential candidate, former Sen. Bongbong Marcos na kapag siya raw ang nanalong presidente ay isasaayos daw niyang mabuti ang pandemic response ng gobyerno.

Kulang na lang, sabihin ni BBM na palpak ang pandemic response ng Duterte gov’t. kaya’t nais niya itong isaayos, boom!

◘◘◘

ANG DATING MAGKAKAMPING LOYALISTA AT DDS NAGBABANGAYAN NA NGAYON SA SOCIAL MEDIA — Matapos sabihin ni dating OWWA (Overseas Workers Welfare Administration) Deputy Administrator Mocha Uson na never daw siyang mag-BBM dahil ayaw daw dito ni P-Duterte sa mga isyung weak, spoiled at may ‘bagahe’, ay pinutakti na siya ng batikos ng mga Marcos loyalists, at dahil marami ring tagasuportang DDS (Duterte Diehard Supporters) si Mocha ay ipinagtanggol nila ito, kaya ang resulta, bangayan nang bangayan ngayon sa social media ang mga loyalista at mga DDS.

‘Yan ang nagagawa ng pulitika sa ‘Pinas, ang dating magkakamping Marcos loyalists at DDS, nagbabangayan na rin ngayon, tsk!

◘◘◘

AKALA NI ATTY. BRUCE RIVERA MARAMING MATUTUWA SA KANYA, MALI PALA, KASI DAMI BUMATIKOS SA KANYA SA POST NIYA NA PANG-IISMOL SA MGA ABOGADONG NAKA-TAKE 2 SA BAR EXAM — Mali ang akala ni Atty. Bruce Rivera na marami ang matutuwa sa kanya sa post niya sa social media tungkol sa pagpuri niya kay vice presidential candidate, Mayor Sara Duterte-Carpio na isang take lang daw ay pasado na agad sa Bar exam, at sa blind item niya sa abogadong naka-2nd take bago pumasa sa Bar, na kahit hindi niya pinangalanan ay halata naman ng marami na si presidential candidate, Vice Pres. Leni Robredo ang pinatutungkulan niya.

Dahil kasi sa post niyang ito, pinutakti siya ng batikos sa social media, period!

◘◘◘

MAY MGA NANALO SA SURVEY, PERO NATATALO SA HALALAN — Bagama’t mababa ang rating sa survey, ay malaki ang paniniwala ni Sen. Koko Pimentel na si presidential candidate, Sen. Manny Pacquiao raw ang mananalo sa presidential election.

Kunsabagay, may punto si Pimentel sa sinabi niyang ito, kasi hindi naman porke mataas rating sa survey ay sure win dahil ang tunay na magwawagi at tatanghaling pangulo ng bansa ay ang mananalo sa May 9, 2022 presidential election, at hindi ‘yung mga nanalo sa survey.

Maraming beses na rin kasing nangyari, ang mga top sa survey, talo ang inaabot sa araw ng halalan, boom!