Kalsada para sa ASEAN, inayos agad; Pinoy, tiis pa rin sa lubak

by Info @Editorial | November 17, 2026

Kapansin-pansin ang pagmamadali sa pagkukumpuni at pagpapaganda ng mga kalsada bilang paghahanda sa 49th ASEAN Summit. Biglang may kakayahang mag-ayos, maglinis, at magpaganda ng mga lansangan kapag may darating na mga dayuhang lider. Pero paano naman ang mga ordinaryong Pilipinong araw-araw na nagtitiis sa mga lubak at sirang kalsadang matagal nang nakatiwangwang?
Nakakagalit na tila kailangang may malaking pandaigdigang pagtitipon bago mabigyang-pansin ang kalagayan ng ating mga lansangan. Habang sinisiguro ang maayos na pagdaan ng mga delegado, maraming motorista at commuter ang patuloy na nakikipagsapalaran sa mga kalsadang puno ng hukay, putik, at alikabok. Hindi ba dapat ang kaligtasan ng mamamayan ang pangunahing prayoridad?
Walang masama sa pagpapaganda ng mga kalsada para sa ASEAN Summit. Ang masama ay kung nagagawa itong madaliin para sa mga panauhin, samantalang ang matagal nang reklamo ng publiko ay nananatiling walang solusyon. Kung kayang kumilos nang mabilis para sa isang international event, bakit hindi magawa para sa mga Pilipinong araw-araw na nagbabayad ng buwis?
Nasaan ang mga kontratista at opisyal na responsable sa mga nakatiwangwang na proyekto? Hindi sapat ang mga pangako at groundbreaking ceremony kung ang resulta ay mga kalsadang nagdudulot ng trapik, aksidente, at dagdag na gastos sa publiko.
Hindi lang mga delegado ng ASEAN ang nararapat sa maayos na kalsada. Mas lalong karapat-dapat dito ang mga Pilipinong araw-araw na dumaraan, nagtitiis, at nagbabayad para rito!



Comments