Alfamart pinasok, suspek huli sa bubong

ni Benjamin Chavez @News | August 20, 2026

Pinasok ng dalawang suspek ang isang sangay ng Alfamart convenience store sa Magsaysay Boulevard, Brgy. Santiago, Baras, Rizal matapos sirain ang bahagi ng bubong at kisame nito.

Nadiskubre ang insidente alas-6:10 ng umaga matapos mahuli ng mga tauhan ng Baras Municipal Police Station (MPS) ang isa umanong suspek na nakita sa bubong ng establisimyento.

Kinilala ang naaresto bilang alyas Prince, 18, residente ng Brgy. Mabini, Baras, habang pinaghahanap ang kasama nitong si alyas John, 19. 

Sa pagsusuri sa CCTV footage, nakitang sa pamamagitan ng pagsira sa bubong at kisame nakapasok ang mga suspek sa tindahan.

Natagpuan naman sa loob ng establisimyento ang iniwang bag na naglalaman ng mga bagay na umano’y tinangkang kunin ng mga suspek. 

Kinumpirma ng store manager na buo ang vault at walang nawawalang pera, paninda o iba pang gamit.