Alamin ang iba pang COVID-19 vaccine sa mundo na nasa phase 3 trials na

ni Nympha Miano-Ang - @Life and Style | December 16, 2020

Nabanggit na natin noong isang araw sa artikulo na ito ang mga pangunahing COVID-19 vaccine na nasa phase 3 trials na ay ang tulad ng Aztra Zeneka, Pfizer vaccine, ang Sputnik V ng Russia, at Sinovac ng China etc. Ang iba pang COVID-19 vaccine ay nasa phase 3 trials na rin.

Ihahalaw natin ang kuwento mula sa artikulo ni Amy McKeever ng National Geographic noong Dis. 11. Alam n'yo bang may 150 coronavirus vaccines ang tinutuklas sa buong mundo at umaasa nang husto ang mga siyentipiko na maibenta na ito sa merkado at malunasan na ang krisis sa kalusugan ng mga tao.

Todo pagsisikap ang ginagawa ng mga eksperto kabilang na ang U.S. government sa kanilang Operation Warp Speed initiative na ginastusan ng $10 bilyon upang pakay na makapagdebelop at makapagturok ng 300 milyong doses na mas ligtas, epektibong coronavirus vaccine na target sa Enero 2021.

Inaasahan din ng World Health Organization na ang hinihintay nilang development ng vaccine ay aabot ng dalawang bilyong doses sa pagtatapos ng 2021.

Isang emergency authorization naman ang natanggap ng Pfizer vaccine para sa COVID-19 sa U.S. upang maturukan na ang 16-anyos pataas na mamamayan. Ginawa ang anunsiyo nang balaan ng White House na sisibakin si FDA commissioner Stephen Hahn kung hindi niya pabibilisin ang approval timeline ng ahensiya.

Kaya naman unang dumating ang shipment na 2.9 milyong doses na vaccine sa buong U.S. para ngayong Linggo. Isang nai-published na pag-aaral kung saan ang vaccine phase 3 trials ay sumasang-ayon sa sinasabi ng kumpanya na ligtas at 95 porsiyento na epektibo.

Inanunsiyo rin ng AstraZeneca at Gamaleya Institute ng Russia na magtutulungan sila na pag-aralan ang posibilidad na pagsamahin ang bisa ng kanilang bakuna na gagamit ng parehong adenovirus upang mas maging ligtas ito.

Inaprubahan naman ng United Arab Emirates ang Sinopharm vaccine ng China para sa 'general use' at sinasabing 86 percent na epektibo kontra COVID-19.

Kung tutuusin, aabot pa ng 10 hanggang 15 taon upang maibenta sa merkado ang bakuna, kung saan ang pinakamabilis na naitala ay ang bakuna para sa beke na apat na taon lamang tinuklas noong 1960's. Ang mga bakunang sumasailaim sa 3-stage clinical trial process bago pa mapa-apruba sa regulatory agencies ay daraan pa sa mahabang proseso.

Kahit pa na ang bakuna ay aprubado na, mahaharap pa rin ito sa proseso ng produksiyon at distribusyon, kabilang na ang pagpapasya kung anong populasyon ang unang bibigyan nito at kung magkano ang halaga.

Marami pa ring bakuna ang nananatili sa phase 4, isang perpetual stage na dumaraan pa sa regular na pag-aaral.

ANG BHARAT BIOTECH. COVAXIN. Isa itong Indian biotechnology company, katuwang ang Indian Council of Medical Research and the National Institute of Virology.

Ang Covaxin ay gumagamit ng 'inactivated vaccine' na kinakailangan ng 2 doses na tinuturok na may 14 na araw na pagitan. Ipinaskel ang mga resulta noong Setyembre pero wala pang matibay na ebidensiya na nakapag-produce ang vaccine ng antibodies sa katawan ng tsonggo.

Sinabi ni Bharat Biotech Executive Director Sai Prasad sa Reuters noong Oktubre na sa preliminary results ng early vaccine trials ay natuklasan na 90 percent ng mga taong naturukan ay nakapagdebelop ng antibodies.

Sa pinakahuling status, noong Oktubre, inanunsiyo ng Bharat na nakatanggap na ito ng approval upang simulan ang phase three trials para sa 26,000 na mga tuturukan sa may 25 centers sa India.

Paano nga ba malalaman na ang isang COVID-19 vaccine ay handa na? At ang limang iba pang bakuna ang tatalakayin natin sa susunod na labas ng artikulo na ito.