89 bilanggo sa INPJ, positive sa COVID-19

ni Thea Janica Teh | November 29, 2020

Umabot sa 89 bilanggo ang naitalang nagpositibo sa COVID-19 sa Ilocos Norte Provincial Jail (INPJ) ngayong Linggo. Sa inilabas na tala ng pamahalaang lokal ng Ilocos Norte, may kabuuang 92 katao ang nagpositibo sa kanilang lugar ngayong Linggo kabilang ang 2 returning overseas Filipino workers, 1 lokal na residente at 89 inmates mula sa INPJ.

Matatandaang nauna nang nagpositibo sa COVID-19 ang 5 empleyado ng INPJ at hinihinalang sa kanila nahawa ang mga bilanggo.

Sa ngayon, nasa 101 na ang kabuuang bilang ng nagpositibo sa COVID-19 sa INPJ habang 357 naman sa buong lalawigan.

Samantala, nitong Biyernes ay isinailalim ang Laoag City sa localized modified enhanced community quarantine (MECQ) dahil sa patuloy na pagtaas ng bilang ng kaso ng virus.