4 pang bata at lola, sapul... Bomba sumabog sa kalsada, 8 yrs. old todas

by Mai Ancheta @News | October 5, 2026

Photo: Bomba sumabog sa kalsada ng Brgy. Sinamar, Roxas, Isabela - SK Sinamar / Circulated

Patay ang isang walong taong gulang na batang lalaki habang limang iba pa ang sugatan matapos ang naitalang pagsabog sa Brgy. Sinamar, Roxas, Isabela kahapon ng umaga, Oktubre 4.

Kinilala ang nasawing bata na si alyas JM, Grade 3, habang ang mga sugatan ay apat na batang lalaki at 85-anyos na lola na kinilalang si Gloria.

Nabatid sa imbestigasyon na bago ang pagsabog ay pinaglaruan ng mga batang biktima ang isang bagay na gawa sa bakal na suspetsa ng mga otoridad ay isang explosive device.

Isang saksi ang nakakita sa mga biktima na naglalakad sa gilid ng kalsada at matapos ang ilang minuto ay nakarinig ng pagsabog kasunod ang pagkahandusay ng mga sugatang bata.

Mabilis na isinugod ang mga biktima sa ospital subalit hindi nakaligtas si JM.

Patuloy na nilalapatan ng lunas ang limang sugatan sa insidente habang inaalam pa ng Roxas Police kung anong uri ng hinihinalang explosive device ang pinaglaruan ng mga biktima.