22-anyos, umaming may gusto sa pinsan ng BF, sinaksak sa dibdib

ni Janice Baricuatro @News | November 3, 2026

Photo: File

Sugatan ang isang 22-anyos na babysitter matapos saksakin sa dibdib ng kanyang nobyo dahil umano sa selos sa General Trias City, Cavite.

Kinilala ang biktima sa alyas Jen, habang naaresto ang suspek na si alyas Son, 23, isang construction worker.

Ayon sa pulisya, nag-iinuman ang magkasintahan kasama ang apat na kaibigan nang aminin ng biktima na may gusto siya sa pinsan ng kanyang nobyo.

Nauwi sa pagtatalo ang pag-amin hanggang sa kumuha umano ng kutsilyo ang suspek at sinaksak ang biktima sa dibdib.

Isinugod sa ospital ang babae, habang sumuko naman ang suspek sa mga rumespondeng pulis matapos ihatid ng kanyang tiyahin.