Iba na ang matipid, 10 money-saving tips

Naka-lockdown pa rin ang lahat ngayon. Ang iba naman ay napilitan nang pumasok sa trabaho kahit may pandemic para kumita na ng pera. Halos 2 buwan kasing nanatili sa bahay at walang kita, kaya umaasa lang sa ayuda.

Sa hirap ng sitwasyon, napapaisip ang iba na kung sana ay nag-ipon na noon para may pang-emergency na magagamit ngayong may health crisis ay sana ginawa na. Ngayong balik-trabaho na ang ilan, dapat matuto na tayo kung paano maitatabi ang kahit kakarampot na kita.

1. HUWAG NANG PASOSYAL SA DAMIT. Mas mahalaga ngayon ang pagsusuot ng facemask at iba pang proteksiyon sa kasuotan. Wala nang panahon ang iba na uriin pa ang iyong suot basta’t sumusunod ka sa protocol na palaging malinis ang katawan, damit at naka-alkohol o hand sanitizer, d’yan ka mamuhunan.

2. MATUTONG MAGKONTROL ‘PAG NASA TINDAHAN NA. Kung hawak mo na ang matagal mo nang kursunadang pantalon sa department store, sandali lang at mag-isip ka muna. Baka naman may tatlo ka pa niyan sa cabinet mo, kailangan mo pa bang dagdagan? Sundin mo agad ang kutob mo kung nagdadalawang-isip ka. Bitiwan mo muna at maghapon o magdamag mo munang isipin kung talagang kailangan mo ang pantalon na ‘yun at itabi ang perang ipambibili mo kung aatras ka.

3. ANG PAUNTI-UNTING PAGBILI AY NAIIPON AT DUMARAMI. May kakaiba kasing disenyo ang coffee cup na ‘yun noong minsang magkape ka, kaya lang ang mahal. Pero huwag na lang, kung kape lang ang habol mo, bakit ‘di ka na lang magkape sa bahay at pasarapin ang iyong timpla? Kung kaya mo namang magluto ng masasarap sa bahay, huwag ka na lang umorder kung hindi ka masiyahan sa lasa at kakaunti lang ang laman.

4. INTERES SA CREDIT CARD, PAGTATAPON LANG NG PERA. Kung susumahin ang dami ng interes na tumubo sa pera sa credit card ay isa nang malaking aksaya at pagtatapon ito.

5. IWASAN DIN ANG LATE FEES. Kapag tumaas na ang payment fees dahil sa huling pagbabayad, hindi lang sa credit card at iba pang regular bills ay malaking sayang din. Kaya ang mabuti pa ay bayaran agad sa oras ang bills. Maaari kang mag-awtorisa nang mas maaga sa withdrawals mula sa checking account para mabayaran ang upa sa bahay, insurance, utang sa sasakyan, utilities, etc. Anuman ‘yan, basta nasa tamang halaga at walang charges.

6. DIREKTANG MAGDEPOSITO NG CASH. Higit kang makaiipon ng pera sa ganitong paraan lalo kung ugaliin mo na kada suweldo ay mag-iimpok ng 30 porsiyento mula sa kinita. Sikapin mong gawin ito at makakasanayan mo ang pag-iipon. Isa pa, ikaw ang siyang tutubo rito at hindi ang mismong bangko.

7. MAGTIPID SA GASOLINA. Sikaping laging bago ang gulong upang mas matipid ang konsumo ng gasolina. Iwasan din ang sobrang tulin ng pagmamaneho. Higit na aksayado ng 20 porsiyento sa gasolina kung 65 miles per hour ang takbo sa halip na 55 lamang.

8. GUMAMIT NG BISIKLETA. Kung nasa 5 kilometro lang ang layo ng pinagtatrabahuhan, puwede nang mag-bisikleta lalo na at prayoridad sa panahon na ito ang paggamit niyan bilang mode of transportation habang pinaiiral ang social distancing. Tiyakin lang na maayos ang gulong na gagamitin at mag-ingat sa daan.

9. IWASANG KUMAIN NANG MADALAS SA LABAS. Habang marami pang mga restaurant ngayon ang hindi nagpapa-dine in, pawang mga take-outs lamang ang pinapayagan, pero mahal pa rin ang umorder. Nakaka-miss na rin talagang kumain sa fastfood ngayon, pero iwasan na muna ang ganitong attitude. Orderin na lang ang menu na mas mura ang halaga dahil mahal ang espesyal na mga pagkain.

10. PAGTITIPID SA BOTTLED WATER. Dahil summertime, mas malakas tayo ngayon sa tubig. Nakakabutas din ng bulsa ang madalas na pagbili sa labas ng deboteng tubig. Pinakamainam na lamang ng sariling inuming tubig na kakasya sa buong maghapon sa trabaho.