Iba pang NCAA games, hindi na lalaruin dahil sa COVID-19

Posibleng kanselahin na ng pamunuan ng National Collegiate Athletic Association (NCAA) lahat ng mga nalalabi nilang events para sa Season 95 dahil sa novel coronavirus (COVID-19) pandemic.

Kahapon sa panayam sa isang programa sa istasyon ng radyo ng ABS-CBN na DZMM, sinabi ni NCAA Management Committee chairman Peter Cayco ng season host Arellano University na inirekomenda na nila sa Policy Board ang pagtapos o terminasyon ng kasalukuyang season. “Actually we proposed to the Policy Board to cancel na the rest of the season. We are still awaiting approval,” ani Cayco. “But in the meantime, we were overtaken by the declaration of a lockdown. So, we still have enough time to contemplate what to do. But for us in the Management Committee, we have decided to recommend the cancellation for the rest of the season because it will eat up to Season 96.”

Ang policy board ay binubuo ng 10 presidente ng mga NCAA member school na kinabibilangan ng Arellano, Colegio de San Juan de Letran, De La Salle-College of Saint Benilde, Emilio Aguinaldo College, Jose Rizal University, Lyceum of the Philippines University, Mapua University, San Beda University, San Sebastian College-Recoletos, at University of Perpetual Help System DALTA.

Ayon pa kay Cayco, nakikipag-ugnayan din ang NCAA sa University Athletic Association of the Philippines hinggil sa mga hakbang na dapat nilang isagawa sa harap ng kasalukuyang krisis.

“We consult each other, continuously exchange ideas with them. We have different approaches but we consult each other,” ani Cayco.

Ang events na maapektuhan kung sakali ng terminasyon ay ang Indoor Volleyball, Football, Lawn Tennis, Soft Tennis, Track and Field event, Under-15 Basketball, Beach Volleyball at Cheerdance Competition.