Hilung-hilo ang mga taga-Iloilo kung kanino magbabayad ng kuryente

Ka Ambo / Bistado

NATUTULIRO ngayon ang mga taga-Iloilo kaugnay sa agawan ng serbisyo ng elektrisidad. Pero, nanindigan ang Energy Regulatory Commission (ERC) na ang tanging power distributor na kanilang kinikilala ay ang MORE Electric and Power Corporation! **** NILINAW ng ERC na may legislative franchise ang More Power na itinakda ng batas at nag-iisang kumpanya na inisyuhan ng Certificate of Public Convenience and Necessity (CPCN) para mag-supply ng kuryente sa buong Iloilo City. Karibal ng More Power ang Panay Electric Company, Inc. (PECO)! **** SINABI ni ERC Chairman Agnes Devanadera, kahit pa man may usaping legal sa pagitan ng PECO at More Power kabilang na ang nakabimbing kaso sa Iloilo Regional Trial Court na isang expropriation case ay hindi nito kayang pigilan kung tungkol sa operasyon ng distribution utility ang pag-uusapan. Ito ay dahil ang hurisdiksiyon na ito ay hawak ng ERC, alinsunod na rin sa itinatakda ng EPIRA Law! **** AYON kay Devanadera, “We respect the cases pending in the lower courts but the fact remain that the ERC has the exclusive authority by virtue of the law when it comes to supply of electricity, power and generation rates and operation of distribution utilities. We stand by our March 5 order that More Power should be the one who should supply the electricity in Iloilo City”. Iginiit ni Devanadera na ang desisyon ng ERC ang siyang dapat manaig at pakinggan ng mga taga-Iloilo! **** HINDI dapat malito ang mga residente kung saan magbabayad ng kanilang billing dahil malinaw sa kanilang order na ang More Power ang kanilang kinikilala bilang lehitimo at nag-iisang distribution utility sa Iloilo. Wala rin umanong nilalabag ang More Power nang mag-operate kahit wala pang Certificate of Exemption mula sa Department of Energy (DOE)! **** ANG kaso ng More Power ay maituturing na emergency dahil ang kanilang ikinokonsidera ay ang matiyak na tuluy-tuloy ang serbisyo ng pagbibigay ng supply ng kuryente sa mga residente. Inaasahan umano na magpapalabas ng sertipikasyon ang DOE sa operasyon ng More Power dahil ito ang siyang may hawak ng prangkisa!