P100-K sa edad 100.. P1 milyon sa 101 yrs. old, lusot na

Inaprubahan na ng House Special Commitee on Senior Citizens ang pagtataas sa P1 milyon ng cash gift para sa mga nakatatanda pagsapit ng edad na 101.

Sa inamyendahang House Bill 1107 ni Buhay Partylist Rep. Lito Atienza, mananatili ang P100,000 cash gift kapag sumapit na sa edad 100 ang senior citizen. Kung tutuntong na ito sa101 taon ay maaari na siyang maging milyunaryo.

Nilalayon nito na magkaroon ng sapat na pondo ang pamilya ng mga lolo at lola upang patuloy silang maalagaan ng kanilang pamilya.

“Bawat Pilipino puwede maging milyonaryo. Our senior citizens deserve recognition and appreciation for their hardwork and dedication during the most productive years of their lives, paying their taxes religiously, and taking care of their families. This one-million peso cash gift for our 101-year-old senior citizens will enable their children and grandchildren to take better care of them, and provide for their everyday needs such as maintenance medicines and the like,” ani Atienza.

Naniniwala pa ang kongresista na madaling makahahanap ng pagkukunan ng pondo ang gobyerno para sa nasabing dagdag na benepisyo.

Batay sa August 1, 2015 census ng Philippine Statistics Authority (PSA), may 4,793 senior citizens na edad 100 taon paatas, gayunman, sa nasabing bilang ay nasa 941 centenarians lang ang nakatatanggap ng benepisyo mula sa gobyerno.

Iginiit pa ni Atienza ang pangangailangan na madaliin ang proseso ng pagbibigay ng benepisyo sa mga centenarian.