FEU-Diliman, pasok na sa finals ng UAAP JRS Basketball

Photo: WeAreTheUAAP

Makalipas ang tatlong taon, balik finals ang Far Eastern University-Diliman matapos pataubin ang Adamson High School, 78-65, kahapon sa pagpapatuloy ng UAAP Season 82 Juniors Basketball Tournament stepladder semifinals sa FilOil Flying V Centre.

Pinamunuan ni Penny Estacio ang nasabing biyahe ng Baby Tamaraws pabalik ng Finals mula ng magkampeon sila noong 2017 sa itinala niyang 18 puntos, 4 na rebounds, at 4 ding assists. “Siyempre, masaya kaming nakabalik sa Finals despite 11 players ang nag-graduate sa amin last year,” ani FEU Diliman coach Allan Albano.

Bukod kay Estacio, malaki din ang naiambag sa panalo ni Mark Padrones na umiskor ng 14 puntos at 4 na rebounds off the bench gayundin si Cholo Anonuevo na may 9 na puntos at 14 boards.

Ang matinding depensa na kanilang ipinakita ang naging susi sa paggapi nila sa Baby Falcons partikular sa key players nitong sina 1-2 Season MVP Jake Figueroa at John Erolon na nagtala ng 11 at 7 puntos ayon sa pagkakasunod.

Katunayan, mayroon lang tig-isang field goal ang nabanggit na dalawang manlalaro ng Adamson na nagtala lang ng 30 percent na field goal shooting.

“Nagawa namin ‘yung game plan naming i-stop si Figueroa at Erolon. Masaya akong ginawa ng mga bata ‘yung homework nila,” ayon pa kay Albano.

Makakaharap at hahamunin ng FEU-Diliman ang undefeated defending champion Nazareth School of National University sa best-of-three Finals sa Marso 6.