OFW na hindi nagpadala ng suweldo sa benepisaryo sa ‘Pinas, hindi na mari-renew ang passport
- Persida Acosta
- Feb 21, 2020
- 2 min read
Dear Chief Acosta, Ako ay overseas Filipino worker (OFW) sa Dubai. Nakaligtaan kong magpadala o mag-remit sa aking pamilya sa Pilipinas noong nakaraang pagtatrabaho ko sa Qatar. Ngayon, malapit nang mag-expire o mawalan ng bisa ang aking pasaporte. May kamag-anak ako na nagsabi sa akin na maaari raw na hindi ma-renew ang aking pasaporte dahil sa aking pagpalya sa pagpapadala ng remittance sa aking mga kamag-anak. Totoo ba ito?- Elizabeth
Dear Elizabeth, Ang sagot sa inyong katanungan ay matatagpuan sa Executive Order No. 857 (EO 857) o mas kilala sa tawag na “Order Governing the Remittance to the Philippines of Foreign Exchange Earnings of Filipino Workers Abroad and for Other Purposes.”
Ayon sa nasabing EO 857, ang overseas Filipino worker (OFW) na napagkalooban ng pasaporte ay maaaring hindi ma-renew o hindi na muling mapagkalooban ng pasaporte kapag ito ay hindi nakapagbigay ng pruweba ng pagsunod sa mandatory remittance requirement, viz:
“SECTION 3. Passports issued to Filipino contract workers shall have an initial period of validity of one year provided that the Ministry of Foreign Affairs may adjust, as circumstances may require, the initial passport validity period. The passport shall be renewable every year upon submission of usual requirements and presentation of documentary proof of compliance to the remittance requirement in the percentages provided for in this Order. The Ministry of Foreign Affairs shall not extend or renew the passport of any contract worker unless proof of his compliance with the mandatory remittance requirement is submitted.” (Binigyang-diin)
Yamang ikaw ay hindi nakapagpadala ng iyong karampatang kita sa iyong mga benepisaryo sa Pilipinas, maaari ito base sa nasabing EO 857 na hindi ma-renew o mapawalan ng bisa ang iyong pasaporte.
Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa isang abogado.
Comments