Basehan para makasuhan ng supplier ang kumpanyang hindi nagbayad ng utang

Dr. Persida V. Rueda-Acosta / Magtanong Kay Attorney

Dear Chief Acosta,

Nagbenta ako ng mga raw materials sa kumpanyang gumagawa ng mga silya. Subalit, isang taon na ang nakalilipas ay hindi pa rin nila ako nababayaran nang buo. Nais kong malaman kung anong aksiyon ang maaari kong gawin laban sa presidente ng nasabing kumpanya nang sa gayun ay masingil ko nang buo ang utang nila sa akin? - Missy

Dear Missy,

Para sa inyong kaalaman, ang inyong katanungan ay tinalakay ng Korte Suprema sa kasong Mercy Vda. De Roxas vs. Our Lady’s Foundation (G.R. No. 182378, March 06, 2013, Ponente: Honorable former Chief Justice Maria Lourdes P. A. Sereno) kung saan sinabi na:

“[ . . . ] a corporation is a juridical entity with a legal personality separate and distinct from those acting for and on its behalf and, in general, of the people comprising it. Hence, the obligations incurred by the corporation, acting through its officers such as in this case, are its sole liabilities.”

x x x

“[ . . . ] in order for us to hold x x x x personally liable alone for the debts of the corporation and thus pierce the veil of corporate fiction, we have required that the bad faith of the officer must first be established clearly and convincingly.”. (Binigyang-diin)

Samakatwid, malinaw na kinakailangan munang mapatunayan ninyo na ang presidente o mga opisyal ng tinutukoy ninyong kumpanya ay may bad faith o intensiyon na manloko sa inyo para hindi magbayad sa kanilang pagkakautang bago pa man siya magkaroon ng pananagutan para sa mga pagkakautang ng kanilang kumpanya.

Dapat din ninyong malaman na sa kaso ng Vector Shipping Corporation and Francisco Soriano vs. American Home Assurance Company and Sulpicio Lines, Inc., (G.R. No. 159213, 03 July 2013, Ponente: Honorable former Chief Justice Lucas P. Bersamin), sinabi ng Korte Suprema:

“Under Article 1144 of the New Civil Code, actions based on written contract must be brought within 10 years from the time the right of action accrued.” (Binigyang-diin)

Sinabi rin nila sa kaso ng University of Mindanao, Inc. vs. Bangko Sentral ng Pilipinas, et al. (G.R. Nos. 194964-65, January 11, 2016, 778 SCRA 458, 483-484, Ponente: Honorable Associate Justice Marvic Leonen) na:

“The prescriptive period neither runs from the date of the execution of a contract nor does the prescriptive period necessarily run on the date when the loan becomes due and demandable. Prescriptive period runs from the date of demand, subject to certain exceptions.” (Binigyang-diin)

Ibig sabihin, kung kayo ay may nakasulat na kontrata, mayroon kayong sampung taon na magsisimula sa panahon na kayo ay nagbigay ng demand letter sa kumpanya upang makapagsampa ng kaso laban sa kanila.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa isang abogado.