Mga cong., ipit.. ABS-CBN vs. P-Duterte

Pumalag ang ilang mambabatas sa umano’y pressure na kaugnay ng pagtalakay sa franchise renewal ng ABS-CBN at nanindigang nag-iingat lang sila sa pagtalakay nito sa Kamara.

Nanawagan si Isabela 1st District Rep. Antonio Albano, vice-chair ng House Committee on Legislative Franchises, na huwag silang i-pressure kaugnay ng pagdinig sa prangkisa ng ABS-CBN na nakatakdang mapaso sa katapusan ng Marso.

“Please do not pressure us so much because we’re taking pressure from both sides of the aisle and no less than the President,” ani Albano.

“Even the networks and even journalists are giving us tremendous pressure this will create biases among members of the legislative franchise committee.”

Gayunman, nilinaw ni Albano na wala namang dikta si P-Duterte tungkol sa isyu.

Itinanggi rin ng Palasyo na may panggigipit sa Kongreso para harangin ang franchise renewal ng ABS-CBN. Ayon kay Presidential Spokesman Salvador Panelo, sakali mang makalusot ang panukalang-batas at ma-renew ang prangkisa ng TV network at i-veto ito ni P-Duterte, maaari pa rin namang i-over rule o over ride ito ng Kongreso.

Nangangahulugan na ang Kongreso pa rin ang may huling pasya sa prangkisa ng ABS-CBN.

Sinabi pa ni Panelo na nakausap niya mismo si Albano at ang tinutukoy umano ng kongresista na pressure ay ang galit ng Pangulo sa ABS-CBN dahil sa hindi pag-ere ng kanyang campaign material noong 2016 Presidential Elections.