Paalam, Bautista, Palicte at Marcial, lalarga na sa Olympic qualifying

Kumpleto na ang 4-man National men’s boxing team na sasabak sa Olympic Qualifying Tournament sa Amman, Jordan sa susunod na buwan.

Masusing dumaan sa ilang serye ng sparring sessions ang anim na boksingero para opisyal na mapili ng national coaches at Association of Boxing Alliances in the Philippines (ABAP) upang maging kinatawan ng bansa para sa Asian-Oceanic Continental qualifying tournament na nakatakda simula Marso 3-11.

Opisyal na nang ABAP mula kay secretary-general Ed Picson ang pagkakapili kina men’s under-52kgs division si 2019 Southeast Asian Games gold medalists light-flyweight Carlo Paalam, Ian Clark Bautista sa men’s under-57kgs class, at James Palicte sa men’s under-63kgs category, gayundin si 2019 AIBA World silver medalist Eumir Felix Marcial na lalaban sa welterweight bout.

Makakasama ng men’s team sina Irish Magno (women’s under-51kgs), Riza Pasuit (women’s under-60kgs) at 2019 AIBA World champion Nesthy Petecio (women’s under-57kgs) sa training sa Thailand at sa qualifying tournament. “They are the official representative in Amman, Jordan for the Asian/Oceania Olympic Qualifying Tournament,” wika ni Picson. “They are on their way to Thailand to set a training camp in preparation for the qualifying tourney.”

Dinaig ni Paalam si dating 2016 Rio Olympics campaigner at 30th edition gold medalist Rogen Ladon, habang naungusan ni Bautista si Mario Fernandez sa bantamweight fight. Kasalukuyang nag-eensayo na si Palicte sa Thailand kasama si Marcial, matapos mapili laban kay Jere Samuel Dela Cruz para sa Light-Welterweight division.

“Dumaan po sila sa tatlong box-off (sparring),” pahayag ni national coach Ronald Chavez sa panayam ng BULGAR. “Lahat naman sila naghanda, basta po ang sigurado natin lahat po ng dadalhin natin sa Olympic qualifying, eh, malaki ang tsansa at alam ko pong pinaghirapan nila itong lahat,” dagdag ng 50-anyos na retired boxer na sumabak sa 1992 Barcelona Olympics sa lightweight division kung saan umabot siya sa quarterfinals.

Naunsyami ang nakatakda na sanang Olympic qualifying noong Pebrero 3-14 sa Wuhan, China, dahil sa novel Corona Virus (nCoV) outbreak, napuwersa ang International Olympic Committee (IOC) na ilipat ang naturang slugfest sa Amman upang maiwasang mahawa ang mga boksingero. Idinagdag ni Picson na babalik ng bansa ang mga national boxers sa Peb. 26 upang lumipad pa-Middle East sa Peb. 28.