May nilabag daw na batas.. ABS-CBN, tuloy — Kamara

Inihayag ng ilang kongresista na kahit pa mapaso na ang prangkisa ng ABS-CBN sa Marso 30, 2020 ay maaari pa rin itong magpatuloy ng operasyon.

Ayon kay Isabela Rep. Antonio Albano, kahit pa mag-expire ang prangkisa ng giant network sa nasabing petsa ay hindi ibig sabihin na sarado na ang TV network.

Aniya, hangga’t ongoing ang 18th Congress ay hindi titigil ang serbisyo ng Kapamilya network dahil nakapagsumite na ito ng aplikasyon bago mag-expire ang kanilang prangkisa.

“May I remind the public that even if the ABS-CBN’s franchise expires on the said date on March, it does not mean that ABS-CBN will close completely because the rule of thumb, and I believe this in the committee – and we were briefed on this – is that while this 18th Congress is still ongoing, hindi po titigil ang services ng ABS-CBN hanggang po matapos ang 18th Congress,” ani Albano, na vice chairperson ng House committee on legislative franchises.

Gayundin ang pananaw ni Quezon City Rep. Jericho Nograles, na aniya’y hindi awtomatiko na mawawala na sa ere ang ABS-CBN. Paliwanag niya, mag-off the air lang ang ABS-CBN kapag hindi ito binigyan ng provisional authority ng National Telecommunications Commission (NTC).

Matatandaan, hiniling ni Solicitor General Jose Calida sa Korte Suprema na ipawalambisa ang prangkisa ng broadcast network na ABS-CBN.

Inihain ang quo warranto petition na nag-ugat umano sa mga paglabag ng ABS-CBN sa ilang terms and conditions ng prangkisa ng ABS-CBN Corporation at subsidiary nitong ABS-CBN Convergence.

Gayunman, sa pahayag ng ABS-CBN, nanindigan ang kompanya na wala itong nilalabag na batas.