Hamon sa SolGen matapos magreklamo sa SC.. Paglabag ng ABS-CBN, ilantad

Hiniling ni Senador Grace Poe sa Office of the Solicitor General (OSG) na ilantad o isapubliko ang detalye ng sinasabing paglabag ng ABS-CBN sa prangkisa kaya naghain ng quo warranto case sa Supreme Court (SC).

“Well unang-una, nais kong malinawan kung ano ba talaga’ng basehan nito kasi sinabi nila abusive practices, diumano, or mapang-abusong gawain, pero hindi naman nadetalye pa sa ating pagsasaliksik o sa news na lumabas kung ano ba itong mga ito,” ani Poe.

“Para sa akin, hindi naman tayo lahat santo, wala namang perpektong kooperatiba o kumpanya, lahat ay may pagkakamali. So, siguro sa mga pagkakamali na ‘yon dapat maidetalye kung anu-ano ang mga ‘yan. Kung ano ang angkop na kaparusahan, pero ito ba ay nangangailangan ng pagkansela,” dagdag pa ng mambabatas,

Sinabi rin ni Poe na dapat nang pag-aralan ang prangkisa ng ABS-CBN na kapangyarihan ng Kongreso, ang Mababang Kapulungan at Senado.

Una nang hiniling ni Solicitor General Jose Calida sa Korte Suprema na ipawalambisa ang prangkisa ng ABS-CBN. Inihain kahapon ng umaga ni Calida sa korte ang quo warranto petition na nag-ugat umano sa mga paglabag ng ABS-CBN sa ilang terms and conditions ng prangkisa ng ABS-CBN Corporation at subsidiary nitong ABS-CBN Convergence.

Gayunman, sa pahayag ng ABS-CBN, nanindigan ang kumpanya na wala itong nilalabag na batas.

Ang unang gustong ipatigil ni Calida ay ang pay-per-view service ng KBO, isa sa mga channel sa ABS-CBN TV Plus dahil wala umano sa prangkisa ng ABS-CBN na puwede itong maningil sa isang free-to-air station. Pero ayon sa kumpanya, aprubado ng gobyerno ang KBO.

Kinuwestiyon din ni Calida ang pag-alok ng ABS-CBN ng Philippine depositary receipts (PDRs) sa mga dayuhan dahil labag umano ito sa Konstitusyon na nagsasabing dapat 100 porsiyentong Filipino-owned ang media companies sa bansa. Gayunman, sagot ng ABS-CBN, ang PDR ay hindi shares of stock at ang may-ari nito ay walang karapatang bumoto.

Rehistrado rin umano at aprubado ng Securities and Exchange Commission (SEC) at Philippine Stock Exchange ang PDRs ng ABS-CBN, tulad ng PDR ng GMA Network.

Katunayan, nauna na umanong sinabi ni dating SEC Chair Teresita Herbosa na inaprubahan ng SEC ang PDR ng ABS-CBN.

Inakusahan din ng OSG ang ABS-CBN Convergence na hindi idinaan sa Kongreso ang paglipat ng prangkisa at hindi pag-alok ng shares of stock nito sa publiko. Pero ayon sa ABS-CBN, ang pagmamay-ari ng ABS-CBN at ABS-CBN Convergence ay kagaya lang din sa ibang telecommunications company. Ito rin ay naaayon sa batas. Inihain ang petisyon kahit nakatakda nang mapaso ang prangkisa ng network sa Marso.