Adamson, umusad sa UAAP girl's basketball finals

Namayani muli ang unang finalist Adamson at hinarang ang tangka ng University of Santo Tomas na pag-usad sa UAAP Season 82 girls’ basketball finals, 70-64, kahapon sa Paco Arena.

Ito ang ikalimang sunod na panalo ng Lady Baby Falcons na nagbaba naman sa Junior Tigresses sa 3-2, panalo-talong rekord. Pinamunuan ni Joan Camagong ang tagumpay ng Lady Baby Falcons sa iniskor na 19 puntos at 13 rebounds, at Crisnalyn Padilla na mayroon ding 19 puntos, bukod sa 6 na assists at 3 steals.

Nasayang naman ang ipinoste ni Erika Danganan na 25 puntos at 11 rebounds dahil ‘di nito naisalba sa kabiguan ang Junior Tigresses.

Dahil dito, binigyan ng UST ng pag-asa ang DLSU Zobel upang makahabol sa finals matapos nitong igupo ang out of contention ng Ateneo, 88-24.

Dulot ng naturang panalo ay umakyat ang Junior Lady Archers sa kartadang 2-3. Maaari pa silang humirit ng playoff para sa huling semifinals slot kung matatalo nila ang UST sa Sabado upang magtabla sila sa markang 3-3.

Samantala, nanatiling walang panalo ang Junior Lady Eaglets matapos ang limang laban.